Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 558 Hüküm no: 769 Orijinal metin no: [87b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Odabaşı’nın odanın çatısı üzerine yaptırdığı bacanın Ebubekir’in evine zararı olmadığı keşif neticesinde anlaşıldığı Keşf Sâdır olan fermân-ı âlîlerine imtisâlen cânib-i şer‘den irsâl olunan keşif nâibi Hıfzı el-Hâc Mehmed Efendi dâ‘îleri hâssa mimârlarından Şa‘bân ve Halil Halîfeler ile mahmiye-i İstanbul’da dergâh-ı âlî cebecilerinin otuz birinci cemâ‘atine mahsûs odaya varıp cebecibaşı izzetlü ( ) ağa ile cerîdede isimleri mastûr Müslimîn huzûrunda akd-i meclis-i şer‘-i şerîf ettikde sâhib-i arzuhâl Havva Hatun’un zevci ve tarafından vekîl-i sâbitü’l-vekâlesi Ebubekir nâm kimesne meclis-i ma‘kūd-ı mezkûrda oda-i mezbûrenin mütevellîsi Mustafa Odabaşı muvâcehesinde işbu akd-i meclis-i şer‘ olunan oda-i mezbûrenin orta sofasının sakfı üzerine mütevellî-yi merkūm Mustafa Odabaşı borucu bacası ta‘bîr olunur baca ihdâs etmekle baca-i mezkûrun müvekkilem merkūmenin menzilinin makarr-ı nisvâna olan mahallere nezâreti olduğundan gayrı bu misillü baca ihdâsı bâ-fermân-ı âlî memnû‘ olmağla kat‘ ve hedm olunması bi’l-vekâle murâdımdır deyü da‘vâ ettikde mimârân-ı mezbûrân ve Müslimîn-i mezkûrîn zikr olunan bacaya nazar eylediklerinde baca-i mezkûrun müvekkile-i mezbûrenin menzilinin makarr-ı nisvân [olan] mahallere nezâreti olmayıp ve bâ-fermân-ı âlî men‘ olunan bacalardan olmadığını mimârân-ı mezbûrân ihbâr ve Müslimîn-i mezkûrîn cem‘ ü ittifâk etmeleriyle vekîl-i mezbûrun tasaddî eylediği da‘vâsı meşrû‘ olmamağın vekîl-i mezbûr Ebubekir’i bi-gayr-ı vechin mu‘ârazadan men‘ eylediğini mevlânâ-yı mezbûr mahallinde ketb ü tahrîr ve ma‘an mürsel ümenâ-i şer‘le meclis-i şer‘a gelip inhâ eyledikleri huzûr-ı âlîlerine i‘lâm olundu. Fî 9 min-şehri Rebî‘ülâhir sene 1153.