Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 557 Hüküm no: 768 Orijinal metin no: [87b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasım’ın eski binasını yıkarak yeniden yaptığı binadaki bazı pencerelerini kapatması Keşf Sâdır olan emr-i âlîlerine imtisâlen cânib-i şer‘den irsâl olunan keşif nâibi Mevlânâ Hıfzı el-Hâc Mehmed Efendi dâ‘îleri hâssa mimârlarından Hüseyin ve es-Seyyid Feyzullah Halîfeler ile mahmiye-i İstanbul’da Kasab İlyas mahallesinde vâki‘ mahall-i nizâ‘ın üzerine varıp Müslimîn huzûrunda akd eylediği meclis-i şer‘de ashâb-ı arzuhâl Kasabzâde Mustafa Efendi ve es-Seyyid Osman ve Hüseyin Efendi ve el-Hâc Yusuf nâm kimesneler meclis-i ma‘kūd-ı mezkûrda bir bâb mülk menzile mutasarrıf olup derûn-ı arzuhâlde mastûrü’l-ism Kasım muvâcehesinde mezbûr Kasım işbu akd-i meclis-i şer‘ olunan menzilini hedm ve vaz‘-ı kadîmini tagyîr ve hilâf-ı fermân-ı âlî üç kat binâ ve muhdes şehnişîn ihrâcına mübâşeret eylediğinden gayrı bizim menzillerimizin makarr-ı nisvân olan mahallerine küşâde eylediği pencerelerinden havâle ve nezâreti olmağla men‘ ü def‘ olunması matlûbumuzdur deyü her biri ba‘de’d-da‘vâ mimârân-ı mezbûrân menzil-i merkūmun kadden irtifâ‘ını mesâha eylediklerinde on üç zirâ‘ yedi parmak olup ve tabaka-i ulyâsında vâki‘ odasının şehnişîni arzen bir başı bir zirâ‘ yirmi iki parmak ve bir başı bir zirâ‘ altı parmak kadden irtifâ‘ında bir zirâ‘ yedi parmak ve şehnişîn-i mezkûrda on dört parmak mugāyir-i emr-i âlî olduğunu mimârân-ı mezbûrân haber ve Müslimîn-i mezkûrîn icmâ‘ ve ittifâk eylediklerinden sonra müdde‘î-i mezbûr Kasabzâde Mustafa Efendi tarafına tabaka-i ulyâsından şehnişîn-i mezkûrdan iki aded pencere ve ittisâlinde vâki‘ bir bâb odasında bir aded penceresinden mezbûr es-Seyyid Osman tarafına ulyâ ve vustâsında iki bâb odasının iki aded şehnişîn pencerelerinden makarr-ı nisvân olan mahallere nezâret ve havâlesi olduğu lede’ş-şer‘ zâhir ve müte‘ayyen oldukdan sonra mârrü’z-zikr Kasabzâde Mustafa Efendi tarafına nezâreti olan üç aded pencerelerinden köşe penceresini bi’t-terâzi sed ve iki adedinin zarâr-ı şer‘îsini havâle ile def‘ ve kezâlik es-Seyyid Osman tarafına nezâreti olan iki aded pencerelere zarâr-ı şer‘îsini sanduka havâle ile def‘ etmek üzere beynleri tevfîk ve bu vechile kat‘-ı nizâ‘ eylediklerini mahallinde ba‘de’t-tahrîr ümenâ-i şer‘le meclis-i şer‘a gelip inhâ ve takrîr etmeleriyle vâki‘ hâli huzûr-ı âlîlerine i‘lâm olundu. Fî 5 min-Rebî‘ülâhir sene 1153.