Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 559 Hüküm no: 771 Orijinal metin no: [87b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çörekçi dükkânındaki eşyanın Ali ve Hasan’a ait olduğu Bâ-mühr-i efendi Ma‘rûz Bundan akdem vefât eden çörekçi tâifesinden Ahmed Beşe’nin kebîr oğlu sâhib-i arzuhâl Mehmed ile sagīr oğlu Mustafa ve sagīre kızı Hadîce’nin vasîleri diğer Hadîce derûn-ı arzuhâlde mezkûrü’l-ism yine çörekci tâifesinden el-Hâc Ali ve el-Hâc Hasan’dan müteveffâ-yı mezbûr bundan akdem müteveffâ el-Hâc İvaz’ın veresesinin Çırçır sûkunda vâki‘ çörekci dükkânında müste’ciri olup ba‘dehû dükkân-ı mezkûrun nısfını verese-i mezkûre-i mezbûrâna ferâğ eylediklerinde zikr olunan fırının içinde mevcûd mevrûsumuz müteveffâ-yı mezbûr Ahmed Beşe’nin sekiz aded tâbe ve bir peşkününü dahi mezbûrân fuzûlî zabt ederler deyü da‘vâ eylediklerinde mezbûrân el-Hâc Ali ve el-Hâc Hasan cevâblarında işbu yedimizde olan i‘lâm-ı şer‘î mûcebince fırın-ı mezkûrun bundan akdem mutasarrıfı olup vefât eden es-Seyyid İvaz’ın hasren vârisleri kebîr oğlu es-Seyyid Mehmed ve kebîre kızı Şerife Fâtıma zikr olunan sekiz aded tâbe ve bir peşkünde müste’cirleri müteveffâ-yı mezbûr Ahmed Beşe’nin kat‘an alâkası olmayıp babaları müteveffâ es-Seyyid İvaz’ın mülkü olup kendülere bi’l-ırsi’ş-şer‘î intikāl eylediğini mezbûr Ahmed’in hayâtında ve muvâcehesinde vech-i şer‘î üzere ba‘de’l-isbât ve’l-hükm zikr olunan tâbeler ve peşkünü mezbûrân es-Seyyid Mehmed ve Şerife Fâtıma’dan semen-i ma‘lûma iştirâ etmişizdir deyü ba‘de’d-def‘ ve’l-inkâr mezbûrân el-Hâc Ali ve el-Hâc Hasan muvâcehelerinde i‘lâm-ı şer‘î mazmûnu üzere def‘-i meşrûhlarını lede’ş-şer‘ adâletleri zâhir olunan çörekci tâifesinden beş nefer şuhûd-ı udûl ile ba‘de’l-isbât ve’l-hükm mezbûr Mehmed ile vasiye-i mezbûre Hadîce bî-vech mu‘ârazadan men‘ olunduğu huzûr-ı âlîlerine i‘lâm olundu. El-emru li-men-lehü’l-emr. Hurrire fî 12 min-şehri Rebî‘ülâhir sene 1153.