Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 560 Hüküm no: 774 Orijinal metin no: [88a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölmüş olan Nikos’un hanımı Meryem’in terekeden hakkını aldığı ve diğer varisin vekili Mardıros’un muarazada bulunmaması Bâ-mühr-i efendi Ma‘rûz Bundan akdem hâlik olan İpekçi Nikos nâm zimmînin verâseti zevcesi Meryem ve li-ebeveyn kız karındaşı Marti ve li-eb kız karındaşı olup Kemah’da sâkine diğer Meryem’e münhasıra ve tashîh-i meseleleri on altı sehmden olmağla sihâm-ı mezkûreden dört sehm merkūme Meryem’e ve dokuz sehmi mesfûre Marti’ye ve üç sehmi diğer Meryem’e isâbeti tahakkukundan sonra mesfûre diğer Meryem’in tarafından bâ-hüccet-i şer‘iyye vekîl-i sâbitü’l-vekâlesi Mardıros zimmî sâhibe-i arzuhâl zevce-i merkūme Meryem’den hâlik-i mesfûrun terekesini bâ-ma‘rifet-i şer‘ tahrîr ve ba‘de ihrâci’l-mesârif bâkī kalan otuz üç bin yedi yüz otuz akçeyi merkūme Meryem ahz u kabz etmekle meblağ-ı mezkûrdan müvekkilemin ber-mûceb-i tashîh-i mezkûr üç sehmine isâbet edeni bi’l-vekâle taleb ederim deyü ba‘de’d-da‘vâ merkūme Meryem dahi zevci hâlik-i mesfûrun terekesini yedinde olan kassâm defteri mûcebince tahrîr ve ba‘de ihrâci’l-mesârif meblağ-ı bâkī-yi mezkûr otuz üç bin yedi yüz otuz akçe makbûzu olduğunu ikrâr lâkin zevcim hâlik-i mesfûrda yedinde olan hüccet-i şer‘iyye mûcebince otuz altı bin akçe cihet-i karzdan hakkım olup ba‘de’l-isbât ve’l-hükm meblağ-ı bâkī-yi mezkûru bâ-ma‘rifet-i şer‘ hakkım olan meblağ-ı mezkûrun ol mikdârına takasan ahz u kabz eyledim deyü ba‘de’d-def‘ ve’l-inkâr mesfûre Meryem yedinde olan hüccet-i şer‘iyye mûcebince def‘-i meşrûhunu lede’ş-şer‘ adâletleri zâhir şâhidîn ile ba‘de’l-isbât ve’l-hükm vekîl-i merkūm Mardıros zevce-i merkūme Meryem’e bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 12 min-Rebî‘ülâhir sene 1153.