Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 560 Hüküm no: 773 Orijinal metin no: [88a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Öldürülen Halil’in oğlu Abdullah’ın birikmiş nafakasından kalan kısmın terekeden tahsil edildiği Ma‘rûz Bundan akdem katîlen fevt olan Halil’in verâseti vâlidesi Safiye Hatun ile li-eb kebîr er karındaşları Ahmed ve Mehmed ve li-üm karındaşı sagīr Mehmed ve li-üm kız karındaşları sagīre Afife ve Ümmügülsüm’e münhasıra oldukdan sonra müteveffâ-yı mezbûrun zevce-i mutallakası sâhibe-i arzuhâl Rukiye Hatun Bâb Mahkemesi’nde meclis-i şer‘de mezbûre Safiye Hatun ile bi’t-terâzi terâfu‘ eylediklerinde müteveffâ-yı mezbûrun firâşından hâsıl sagīr oğlum Abdullah’ın ber-mûceb-i hüccet yevmî üçer para nafaka-i mefrûza-i müstedânesinden dört senede müctemi‘ yüz sekiz guruşdan bâkī seksen beş buçuk guruşu mezbûre Safiye Hatun’un tereke-i müteveffâ-yı merkūmdan makbûzu olup südüs hissesine isâbet eden ma‘lûmü’l-mikdâr meblağdan taleb ederim deyü tasaddî eylediği da‘vâsından mezbûre Safiye Hatun ile on guruş bedel-i makbûza sulh olup nafaka-i mezkûreye müte‘allıka âmme-i da‘vâdan mezbûrân Ahmed ve Mehmed’den mâ‘adâ ancak mezbûre Safiye’nin evlâdları sagīrûn-ı mezbûrûn Mehmed ve Afife ve Ümmügülsüm’ün zimmetlerini ibrâ edip kat‘-ı nizâ‘ eyledikleri huzûr-ı âlîlerine i‘lâm olundu. Fî 12 min-şehri Rebî‘ülâhir sene 1153.