Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 562 Hüküm no: 776 Orijinal metin no: [88a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dâye Hatun mahallesindeki hanın odabaşı ve hancılığına Margos’un devam etmesi Ma‘rûz Merhûme Hoca Sadeddin Efendi nâm sâhibü’l-hayrın vakfı olup Mahmud Paşa kurbünde Dâye Hatun mahallesinde vâki‘ kârgîr hanın odabaşısı ve hancısı olan Margos v. Marat zimmînin keyfiyet-i ahvâli sâdır olan fermân-ı âlîlerine imtisâlen hasımları Nehabet ve Avadik zimmîler muvâcehelerinde mahalle-i mezbûre imâmı Hüseyin Efendi ve ahâlîden on beş nefer müseccelü’l-esâmî kimesneler ile han-ı mezbûr tüccârından on nefer mazbûtü’l-esâmî Müslim ve zimmîlerden tefahhus ve suâl olundukda mesfûr Margos on beş yirmi seneden beri han-ı mezbûrda odabaşı ve hancı olup bu âna gelince aslâ ve kat‘â bir hıyâneti zuhûr etmeyip kendiden her vechile hoşnûd ve râzılarız mesfûrân Nehabet ve Avadik mechûlü’l-ahvâl ve müştebihü’l-etvâr olmalarıyla mesfûrândan bir vechile emîn değilleriz mesfûr Margos emîn ve mu‘temedimiz olmağla han-ı mezkûrda kemâ-fi’l-evvel hancı olması matlûbumuzdur deyü ihbârları Mahkeme-i Bâb’da tescîl ve huzûr-ı âlîlerine i‘lâm olundu. Fî 10 min-şehri Rebî‘ülâhire sene 1153.