Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 576 Hüküm no: 809 Orijinal metin no: [90b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İran seferinde vefat eden Mustafa’nın kız kardeşinin tereke hususundaki iddiasını ispatlayamadığı Bâ-mühr-i efendi Ma‘rûz Rumeli’de Gümülcine kazâsı ahâlîsinden olup bundan akdem İran seferinde vefât eden Mustafa b. Ahmed’in verâseti li-ebeveyn karındaşı İbrahim ile li-ebeveyn kız karındaşı Fâtıma’ya ba‘de’l-ihzâr zâtı ta‘rîf-i şer‘î ile mu‘arrefe olan sâhibe-i arzuhâl mezbûre Fâtıma meclis-i şer‘de kazâ-i mezbûr ahâlîsinden olup derûn-ı arzuhâlde mezkûrü’l-ism Mehmed Ağa b. Sefer’den mûrisim müteveffâ-yı mezbûrun yanında mevcûd olan terekesini îsâle vasiyy-i muhtârı Halil’in makbûzu olan dört yüz elli guruş ve gāib ani’l-meclis Kara Kulak Veli Ağa zimmetinde cihet-i karzdan olan üç yüz elli guruş ve Dimetoka kazâsına tâbi‘ Ilıca kazâsı ahâlîsi zimmetlerinde cihet-i karzdan olan sekiz yüz elli guruş ki cem‘an bin altı yüz elli guruş ile Gümülcine’de sâkin olduğu menzilinde olan eşyâ-i memlûkesinden mecmû‘u dört yüz doksan dört guruş kıymetli yüz vakıyye bakır ve on iki sîm zarf ve iki sîm kahve ıbrığı ve dört Cezâyir ihrâmı ve bir sîm çapkun rahtı ve bir sîm kılıç ve bir sîm topuz ve bir sîm külünk ve bir sîm devât ve dört kotoz dolama ve dört çakşır ve dört anteri ve dört çuka dolama ve bir top hâre ve altı aded destârı mezbûr Mehmed Ağa bi-gayr-ı hakkın fuzûlî ahz u kabz etmekle meblağ-ı mezbûr ile eşyâ-i mezkûreden hisse-i irsiyemi taleb ederim deyü ba‘de’d-da‘vâ zikr olunan bin altı yüz elli guruşu müdde‘iye-i mezbûrenin takrîr-i meşrûhu üzere mezbûr Mehmed Ağa’dan da‘vâsı sahîh olmayıp hasm-ı şer‘î olmamağla şer‘an suâl dahi teveccüh etmediğinden sonra merkūm Mehmed Ağa eşyâ-i mezkûreyi kabzını gıbbe’l-istintâk ve’l-inkâr müdde‘iye-i mezbûre müdde‘âsını beyâna kādire olmayıp bi’t-taleb mezbûr Mehmed Ağa tahlîf olunmağın mûcebince müdde‘iye-i mezbûre bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 26 min-şehri Rebî‘ülâhir sene 1153.