Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 87 Hüküm no: 1 Orijinal metin no: [1a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Başta Rusya olmak üzere bütün Hristiyan devletlere fermanla izin verilmeden otağ, çadır ve diğer mühimmatların satılmaması Akzâ kuzâtü’l-Müslimîn evlâ vülâti’l-muvahhidîn ma‘denü’l-fazli ve’l-yakīn râfi‘u a‘lâmi’ş-şerî‘ati ve’d-dîn vârisü ulûmü’l-enbiyâi ve’l-mürselîn el-muhtassu bi-mezîd-i inâyeti’l-meliki’l-mu‘în Mevlânâ İstanbul kādısı zîdet fezailehû tevkī‘-i refî‘-i hümâyûn vâsıl olıcak ma‘lûm ola Moskovlu ve sâirlerine otağ ve oba ve çerge ve sâir hıyâm iştirâ olunup verildiği var mıdır deyü Mehterân-ı hayme ocağı bölükbaşıları ve ihtiyârlarından suâl olundukda bazı çâsârlar taraflarından Devlet-i aliyye’ye gelen elçileri vilâyetlerine avdet ettiklerinde cânib-i Devlet-i aliyye’den bir mikdâr çadır ve çerge iltimâs ettiklerinde bâ-fermân-ı âlî mevcûd-ı Mehterhâne’den ve sûkdan çadır ve çerge mübâya‘a verildiği vardır fermân-ı âlî sâdır olmadıkca verdiğini bilmeziz deyü ocaklı neferâtı cevâb verip ve çadırcı esnâfının çadırcıbaşı ve kethudâsı ve serneferi? ve seryiğidinden dahi suâl olundukda onlar dahi kefere tarafına sûkdan çadır ve çerge mübâya‘a olundukda fermân-ı âlî sudûruna muhtâcdır deyü cevâb verdiklerin Hayme-i hâssa mehterbaşısı olan kıdvetü’l-emâcid ve’l-a‘yân Mehmed zîde mecduhû i‘lâm etmeğin i‘lâmı mûcebince bilâ-fermân-ı âlî düvel-i Nasârâya çadır ve çerge ve mühimmât-ı sâire verilmemek bâbında fermân-ı âlîşânım sâdır olmağın sen ki mevlânâ-yı mûmâ-ileyhsin min-ba‘d bilâ-fermân düvel-i Nasârâya çadır ve çerge ve mühimmât-ı sâire verilmemek üzere tenbîhi lâzım gelenlere tarafından muhkem tenbîh ve te’kîd eylemen bâbında fermân-ı âlîşânım sâdır olmuşdur buyurdum ki vusûl buldukda bu bâbda vech-i meşrûh üzere şeref-yâfte-i sudûr olan fermân-ı vâcibü’l-ittibâ‘ ve lâzımü’l-imtisâlimin mazmûn-ı itâ‘at-makrûnuyla âmil olasız şöyle bilesiz alâmet-i şerîfe i‘timâd kılasız. Tahrîren fî-evâili Cemâziyelâhir sene 1163 Be-makām-ı Kostantıniyye