Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 88 Hüküm no: 2 Orijinal metin no: [1b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nalçacı esnafının kethudalığına Hacı Mehmed Çelebi b. Mustafa’nın tayini <> A‘lemü’l-ulemâi’l-izâm efdalü’l-fudalâi’l-fihâm zahru’l-mevâli’l-kirâm sa‘âdetlü semâhatlü Çelebizâde İsmail Âsım Efendi hazretlerinin zamân-ı mekremetlerinde olan i‘lâmât sicillinin ikinci sicill-i mahfûzlarıdır. Fi’l-yevmi’r-râbi‘ ve’l-işrîn min-Safer sene 1162 Bâ-mühr-i hazret-i efendi Kethudâ-yı na‘lçacı Ashâb-ı arzuhâl na‘alçacı esnâfının yiğitbaşıları Abdullah Çelebi ve duâcıları Mehmed Efendi ve mütevellîleri Mustafa Çelebi ve ihtiyâr ustalarından Bey Mustafa Ağa ve Mustafa Çelebi ve el-Hâc İbrahim ve İbrahim Usta ve Usta Mehmed ve Mustafa Çelebi ve Molla Osman ve es-Seyyid el-Hâc Mehmed Çelebi ve es-Seyyid el-Hâc Abdülvehhab Çelebi ve Ömer Bey ve Süleyman Çelebi ve el-Hâc Ahmed ve Molla İsmail ve Usta Ahmed ve sâir mazbûtü’l-esâmî ustalar meclis-i şer‘de derkenârda mastûr olduğu üzere bâ-berat-ı âlîşân kethudâmız olan Halil b. Mustafa nâm kimesnenin evzâ‘ ve etvârından hoşnûd ve râzı olmadığımızdan esnâfımız kethudâlığı mezbûr Halil’den ref‘ ve cümlemizin muhtârı olan işbu el-Hâc Mehmed Çelebi b. Mustafa ihtiyâr ustalarımızdan olmağla yerine kethudâ nasb u ta‘yîn ve yedine berat-ı âlîşân sadaka ve ihsân buyurulmak matlûbumuzdur dediklerinde bu makūle kethudâlık esnâfın muhtârı olmak lâzım olduğundan kethudâlık-ı esnâf-ı mezkûre mezbûr Halil b. Mustafa ref‘inden muhtârları olan merkūm el-Hâc Mehmed Çelebi b. Mustafa’ya tevcîh ve yedine berat-ı âlîşân sadaka ve ihsân buyurulmak bâbında ber-minvâl-i muharrer istid‘â ve istirhâmât ma‘lûm-ı devletleri buyruldukda emr ü fermân hazret-i veliyyü’l-emrindir. Fî 24 Safer sene 1162