Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 94 Hüküm no: 11 Orijinal metin no: [2b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ömer mahallesi ahalisinin talepleriyle Çukadar Salih b. Halil’in evinde ikamet ettirdiği Çukadar Ali ile hanımını evinden çıkarmasına yapılan tenbih Bâ-mühr-i hazret-i efendi Ma‘rûz Seyyid Ömer mahalle[si] ahâlîsinden imâmı Ömer Efendi ve müezzini el-Hâc Ali Halîfe ve Mehmed Odabaşı ve İbrahim Odabaşı ve Alemdâr Mehmed ve el-Hâc İbrahim ve İbrahim ve Ali Ağa ve Veliyüddin Çelebi ve sâir mazbûtü’l-esâmî on nefer kimesneler meclis-i şer‘de Çukadâr Salih b. Halil mahzarında mezbûr mahallemizde vâki‘ Debbağzâde kethudâsı Hüseyin Efendi odaları demekle ma‘rûf odalarda tasarrufunda olan bir sagīr menzilde zevcesi ile sâkin olup menzil-i mezkûrda âharın süknâsı bir vechile mümkün değil iken mezbûr Çukadâr Salih gāib ani’l-meclis Çukadâr Ali nâm kimesneyi dahi karındaşım deyü zevcesiyle ma‘an menzilde iskân edip her vechile herbiri âhardan ictinâb mümkün olmadığından mezbûr Ali’yi ve zevcesini menzilinden ihrâc etmek üzere merkūm <> Çukadâr Salih’e tenbîh olunmak matlûbumuzdur dediklerinde gıbbe’s-suâl mezbûr Çukadâr Salih dahi gāib-i merkūm zevcesiyle menzilinde iskân ettiğini ve menzilinin kābil-i taksîm olmadığını el-hâsıl nâ-mahrem ile muhâlata iktizâ edecek hâlâtı mukır ve mu‘terif olmağla mezbûr Çukadâr Ali’yi ve zevcesini menzilinden ihrâca merkūm Çukadâr Salih’e tenbîh-i ekîd olunduğu ba‘de’t-tescîl huzûr-ı âlîlerine i‘lâm olundu. Fî 5 Rebî‘ülevvel sene 1162