Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 93 Hüküm no: 10 Orijinal metin no: [2b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Ömer’in kendisini boşayan Aşçı Mustafa b. Mehmed’de olan mehir bedeli hakkında sulh olduğu Ma‘rûz Fi’l-asl Rumeli’de İbrail kasabası ahâlîsinden olup mahmiye-i İstanbul’da Cerrâhpaşa Câmi‘-i şerîfi civârında Kürkçübaşı mahallesinde sâkine ve zâtı ta‘rîf-i şer‘î ile mu‘arrefe olan Fâtıma bt. Ömer nâm hatun meclis-i şer‘-i enverde zevc-i sâbıkı Aşçı Mustafa b. Mehmed muvâcehesinde mezbûr Aşçı Mustafa mukaddemâ mârrü’z-zikr İbrail kasabasında beni zevce-i medhûlün-bihâsı iken iki def‘a tatlîk ve her birinde tecdîd-i akd edip ve mahmiye-i mezbûreye geldiğimizden sonra dahi tatlîk etmekle ben mezbûrdan üç talâk boş olup ve ber-vech-i muharrer üç talâk boş olduğumu mezbûr Aşçı Mustafa huzûr-ı Müslimînde ikrâr dahi etmiş iken yine beni kendiye fâsiden nikâh edip benimle ezvâc mu‘âmelesi murâd eder hâlâ mezbûr benden keff-i yed ve beynimiz tefrîk ve zimmetinde olan on iki guruş mehr-i müsemmâmı taleb ve da‘vâ ol dahi cevâbında on iki guruş mehr-i müsemmâ ile zevce-i menkûhası olduğumu ikrâr lâkin bâlâda mezkûr olduğu üzere mukaddemâ üç def‘a tatlîk eylediğini inkâr ve ben dahi müdde‘âmı ahrâr-ı ricâl-i Müslimînden lede’t-tezkiye adâletleri sâbit ve zâhir olan Molla Hüseyin b. el-Hâc Mehmed ve Molla Abdullah b. Mustafa ve Ali b. Abdullah ve Hüseyin b. Ahmed nâm kimesneler şehâdetleriyle mezbûr Aşçı Mustafa muvâcehesinde vech-i şer‘î üzere ba‘de’l-isbât ve’l-kabûl mûcebiyle beynûnet-i galîza ile tefrîkıma hükmolunmağla mezbûr Aşçı Mustafa zimmetindeki on iki guruş mehr-i müsemmâmdan bâ-vesâtet-i muslihîn kendi rızâ ve ihtiyârımla iki buçuk guruş bedel-i makbûza sulh olup mâ‘adâsına müte‘allika da‘vâdan mezbûr Aşçı Mustafa’nın zimmetini ibrâ ve ıskāt eyledim deyü olan kelimâtını mezbûr Aşçı Mustafa’nın tasdîk eylediği mahkeme-i bâbdan huzûr-ı âlîlerine i‘lâm olundu. Fî-gurreti şehri Rebî‘ülevvel sene 1162