Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 96 Hüküm no: 15 Orijinal metin no: [3a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dikici Avanis v. Kirkor’un dükkânındaki eşyalarını haksız yere aldığı iddiasıyla Sütçü Kiga v. Tarpo’ya açtığı davada haksız bulunduğu Ma‘rûz Dikici tâifesinden sahib-i arzuhâl Avanis v. Kirkor zimmî meclis-i şer‘-i enverde arzuhâlde mezkûr Südçü Kiga v. Tarpo zimmî muvâcehesinde mukaddemâ merkūm Südçü Kiga zimmînin Kumkapı’da vâki‘ menzili tahtındaki dikici dükkânı şehrî beş guruş ücretle benim taht-ı icâremde iken emti‘a-i mütenevvi‘am ile meşgūleten dükkân-ı mezkûrumu kapayıp arzuhâlde mezkûr olduğu üzere olan husûsumu görmek için âhar mahalle gidip hâlâ geldiğimde mesfûr Südçü Kiga dükkân-ı mezkûru açıp benim içinde olan müfredât defteri mantûkunca üç yüz guruşluk emti‘a-i mezkûremi bi-gayr-ı hakkın ahz etmekle emti‘a-i mezkûremin mevcûde-i a‘yânını ve müstehleke kıymet-i mezkûresini ba‘de’s-sübût taleb ederim deyü ba‘de’d-da‘vâ ve’s-suâl merkūm Südçü Kiga zimmî cevâbında kendi müdde‘î-i mesfûrun dükkân-ı mezkûrunu açıp içinde emti‘asını ahzını inkârından mâ‘adâ müdde‘î-i mesfûr diyâr-ı âharda iken dükkân-ı mezkûrda olan emti‘a zâyi‘a ve telef olmasın için vakt-i mezkûrda dikicibaşı olan işbu hazır bi’l-meclis Halil Ağa dikici ustaları beyninde dükkân-ı mezkûru feth ve içinde bulunan emti‘ayı defter edip işbu müdde‘î-i mesfûr gelince hıfzı’çün ahz ve bin yüz altmış bir senesi Şa‘bân-ı şerîf’inin on beşinci günü müdde‘î-i mesfûr diyâr-ı âhardan geldikde dükkân-ı mezkûrundan kabz eylediği emti‘asını ber-mûceb-i defter müdde‘î-i mesfûra def‘ ve teslîm ol dahi yedinden ahz u kabz edip dükkân-ı mezkûrda olan emti‘asına müte‘allika âmme-i da‘vâdan mezbûr Dikicibaşı Halil Ağa’nın ve benim dahi zimmetlerimizi ibrâ ve ıskāt etmişidi deyü ba‘de’d-def‘ ve’l-inkâr merkūm Südçü Kiga zimmî [def‘-i] meşrûhunu ahrâr-ı ricâlden lede’t-tezkiye şehâdetleri makbûle olan Mehmed Çelebi b. Mustafa nâm Müslim ile Abraham v. Nikagos nâm zimmîler şehâdetleriyle müdde‘î-i mesfûr Avanis zimmî muvâcehesinde vech-i şer‘î üzere ba‘de’l-isbât ve’l-kabûl mûcebiyle müdde‘î-i mesfûr Avanis da‘vâ-yı mezkûresiyle merkūm Südçü Kiga zimmîye bî-vech-i şer‘î mu‘ârazadan men‘ olunduğu bâbdan huzûr-ı âlîlerine i‘lâm olundu. Fî 9 şehri Rebî‘ülevvel sene 1162