Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 97 Hüküm no: 16 Orijinal metin no: [3a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ürgüb’ün Eneği köyünden Dimitri v. Nemel v. Dimitri’nin varislerinden Hürmüz’ün hissesini zaptettiği iddiasıyla diğer varis Dimitri’ye açtığı davanın zaman aşımı nedeniyle reddedildiği Ma‘rûz Anadolu’da Ürgüb kazâsına tâbi‘ Eneği nâm karyede sâkin iken bundan akdem hâlik olan Dimitri v. Nemel v. Dimitri nâm zimmînin verâseti sulbî oğulları İstirati ve Anton’a ba‘de’l-inhisâr mezbûr İstirati zimmî dahi hâlik olup verâseti sulbî kebîr oğlu Hürmüz zimmîye münhasıra olup ba‘dehû mesfûr Anton dahi hâlik olup verâseti sulbî kebîr oğlu diğer Dimitri zimmî muvâcehesinde mûrisimiz hâlik-i evvel mesfûr Dimitri’nin terekesinden olup karye-i mezbûrede vâki‘ bir tarafdan Osman Beşe ve bir tarafdan Ahmed Ağa ve bir tarafdan el-Hâc Mehmed mülkleri ve bir tarafdan tarîk-ı âm ile mahdûd ma‘lûmü’l-müştemilât bir bâb mülk menzil ile yine karye-i mezbûrede vâki‘ ma‘lûmü’l-hudûd kürûmu mülk bir kıt‘a bağ ve yine karye-i mezbûrede vâki‘ lede’l-ahâlî ve’l-cîrân bir kıt‘a tarladan ber-münâsahat-i mezkûre nısfı bana ve nısf-ı âharı diğer mesfûr Dimitri’ye intikāl etmiş iken merkūm diğer Dimitri menzil ve bağ ve tarla-yı mezkûrûnu müstakillen zabteder menzil ve bağ ve tarladan nısf hisselerimden kasr-ı yedine tenbîh taleb ederim deyü ba‘de’d-da‘vâ ve’s-suâl merkūm diğer Dimitri cevâbında müdde‘î-i mezbûr Hürmüz’ün babası mezbûr İstirati hayatında mûris ve ceddimiz merkūm Dimitri’nin helâkinden sonra târih-i i‘lâmdan on sekiz sene mukaddem menzil-i mezkûrdan ve bağdan nısf hisse-i irsiyesini hayatında benim babam hâlik-i mesfûr Anton’a işbu yedimdeki bir kıt‘a mübâya‘a hücceti mantûkunca on guruş semen-i makbûza bey‘ ve temlîk ve mârrü’z-zikr tarladan nısf hissesini dahi ma‘rifet-i sahib-i arzla beş guruş bedel-i makbûz mukābelesinde babam mesfûra ferâğ etmişidi deyü mazmûnu takrîr-i meşrûhuna mutâbık bir kıt‘a hüccet-i şer‘iye ibrâz ve târih-i mezkûrdan beri babam hâlik-i mesfûr ve ba‘dehû ben müdde‘î-i mesfûrun babası muvâcehelerinden bilâ-nizâ‘ zabt u tasarruf ederim deyü mürûr-ı zamanla olan def‘ini müdde‘î-i merkūm Hürmüz zimmî dahi ikrâr etmeğin mûcebiyle on beş sene bilâ-özr-i şer‘î terk olunan da‘vânın bilâ-emr-i şerîf istimâ‘ından hükkâm-ı şer‘î memnû‘lar olmağla müdde‘î-i mesfûr Hürmüz bilâ-emr-i şerîf bî-vech-i şer‘î mu‘ârazadan men‘ olunduğu huzûr-ı âlîlerine i‘lâm olundu. Fî 9 min-Rebî‘ülevvel sene 1162