Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 102 Hüküm no: 24 Orijinal metin no: [4a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dikici esnafından Ahmed Beşe’nin esnaflıktan uzaklaştırıldığı halde tekrar dikicilik yapmaya başlayıp huzursuzluk çıkardığından uslanıncaya kadar dikicilik yaptırılmaması Ma‘rûz İstanbul’da ihrâm ve kuşak ve şâl ve Mısrî makrame şeridi ve dikici esnâfının kethudâları İbrahim Çelebi b. <> Abdullah ve yiğitbaşıları Hasan Çelebi b. Hüseyin ve ustalarından İbrahim b. el-Hâc Ali ve Mustafa b. Ahmed ve el-Hâc İbrahim b. Hasan ve el-Hâc Musa b. Mehmed ve İbrahim b. Osman ve sâir ustalar meclis-i şer‘-i enverde yine esnâf-ı mezkûre ustalarından olup lâkin mukaddemâ cümle ihtiyâr ustalarımız ittifâk ve ittihâdlarıyla işbu yedimizde sah ber-keşîde fermân-ı âlî[yi] hâvî i‘lâm-ı şer‘îmiz mantûkunca olan nizâmımıza mugāyir vaz‘ ü hareket ve esnâfımız ustaları beynlerine ihtilâl verir deyü bundan akdem mezbûrdan teşekkî eylediğimizde mezbûr Ahmed Beşe dahi fîmâ-ba‘d kendi hâlinde olup nizâmımıza mugāyir hareket etmemek üzere ta‘ahhüd edip ber-vech-i muharrer yedimize i‘lâm-ı şer‘î dahi vermişiken hâlâ yine kendi hâlinde olmayıp evvelkiden ziyâde nizâmımıza muhâlefet hareket ve esnâfımız ustaları beynlerine ihtilâl verdiğinden mâ‘adâ herbirimize şetm ve ırzlarımızı hetk eder deyü teşekkî ve mezbûr Ahmed Beşe’nin salâhı zâhir olunca san‘at-ı mezkûreyi işlemekden men‘ile ta‘zîr olunmasını iltimâs eyledikleri bâbdan huzûr-ı âlîlerine i‘lâm olundu. Fî 12 Ra sene 1162