Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 101 Hüküm no: 23 Orijinal metin no: [4a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sığır kasabı Süleyman b. Mehmed’in ortağı Süleyman b. İsmail’de alacağı kaldığı iddiasıyla açtığı davayı ispat edemediği Ma‘rûz Sığır kasabı tâifesinden Süleyman b. Mehmed meclis-i şer‘-i enverde tâife-i mezkûreden mukaddemâ şerîki diğer Süleyman b. İsmail muvâcehesinde mezbûr diğer Süleyman ile beynimizde beraber olmak üzere san‘at-ı mezkûrede ba‘de akdi’ş-şirke müddet-i ma‘lûme iştirâken eylediğimiz kasablık ticâreti nemâsından mezbûr diğer Süleyman’ın yedinde on bin akçe cem‘ olup meblağ-ı mezbûrdan bana isâbet eden beş bin akçenin üç bin yüz seksen akçesini bana def‘ ve teslîm ve bin sekiz yüz yirmi akçesini yed ve zimmetinde kalmağla taleb ederim deyü ba‘de’d-da‘vâ ve’s-suâl mezbûr diğer Süleyman cevâbında fi’l-vâki‘ mukaddemâ müdde‘î-i mezbûr ile kasablık ticâretinde şerîkler olup müddet-i ma‘lûme i‘mâllerini ikrâr lâkin müddet-i mezkûrede hâsıl olan nemâdan müdde‘î-i mezbûrun hissesini kabzını i‘tirâf eylediği meblağ olup ziyâde olduğunu inkâr etmeğin müdde‘î-i mezbûr ziyâde müdde‘âsını beyândan ızhâr-ı acz birle lede’l-istihlâf ve’t-tahlîfi’ş-şer‘î mûcebiyle müdde‘î-i mezbûr Süleyman bilâ-beyyine da‘vâ-yı mezkûresiyle mezbûr diğer Süleyman’a bî-vech-i şer‘î mu‘ârazadan men‘ olunduğu mahkeme-i bâbdan tescîl ve huzûr-ı âlîlerine i‘lâm olundu. Fî 12 Rebî‘ülevvel sene 1162