Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 104 Hüküm no: 26 Orijinal metin no: [4b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gümüş ve altın arayıcı Habib v. Magar’ın Kuyumcu Agop v. Odik’den aldığı dört çuval ramaddan eksik altın ve gümüş çıkması üzerine ramadı geri Agop’a vermesi Agop’un da parayı Habib’e iade etmesi Ma‘rûz Gümüş ve altın arayıcı esnâfından Habib v. Magar Yahûdî meclis-i şer‘-i enverde kuyumcu esnâfından Muhzır es-Seyyid Mehmed mübâşeretiyle ihzâr-ı şer‘ olunan Agop v. Odik zimmî muvâcehesinde târih-i i‘lâmdan sekiz gün mukaddem merkūm Agop zimmî Mercan sûkunda Zencirlihan’da vâki‘ odasında olan dört çuval ramâdını içinde seksen guruşluk altın ve gümüş çıkar deyü altmış altı guruşa bana bey‘ ve teslîm ben dahi ba‘de’l-iştirâ ve’l-kabz semen-i mezkûrunu yedimden ahz etmişidi ancak ber-vech-i muharrer bey‘ fâsid olduğundan mâ‘adâ ramâd-ı mezkûr içinde ancak on guruşluk altın ve gümüş zuhûr edip tagrîr dahi olmağın hâlâ bi-hükmi’l-fesâd ve’t-tagrîr zuhûr eden işbu altın ve gümüş fesh-i bey‘le geriye ahz ve kabzı olan altmış altı guruşu bana reddini taleb ederim deyü ba‘de’d-da‘vâ ve’s-suâl merkūm Agop zimmî cevâbında fi’l-vâki‘ kazıyye minvâl-i muharrer üzere olduğunu ikrâr ve i‘tirâf edip ancak ramâd-ı mezkûrdan zuhûr eden altın ve gümüş ziyâdedir deyü olan da‘vâsında dahi bi’t-taleb müdde‘î-i mesfûr Habib Yahûdî hasbe’ş-şer‘i’l-enver tahlîf olunmağın mûcebiyle zuhûr eden altın ve gümüşü geriye ahz ve makbûzu olan meblağ-ı mezkûr altmış altı guruşu müdde‘î-i mesfûra red ve teslîme merkūm Agop zimmîye tenbîh olunduğu bâbdan huzûr-ı âlîlerine i‘lâm olundu. Fî 14 Ra sene 1162