Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 105 Hüküm no: 27 Orijinal metin no: [4b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Aleksan v. Toma’nın alacak iddiasıyla Çubukçu Mehmed b. Ramazan’a açtığı davada Mehmed’in borcunu daha önce ödediğini ispat ettiği Ma‘rûz Mumcu Halil Beşe mübâşeretiyle Bâb Mahkemesi’ne ihzâr olunan çubukçu tâifesinden Mehmed b. Ramazan’ın hasmı sarrâf tâifesinden Aleksan v. Toma nâm zimmî meclis-i şer‘-i enverde mezbûr Mehmed muvâcehesinde târih-i i‘lâmdan yedi sene mukaddem yedimden iştirâ ve kabz eylediği yirmi altı bin iki yüz altmış germeşik çubuğu semenlerinden bâkī mezbûr Mehmed zimmetinde yirmi iki buçuk guruş hakkım olmağla meblağ-ı [5a] bâkī-i mezbûru mezbûr Mehmed’den taleb ederim deyü ba‘de’d-da‘vâ ve’s-suâl mezbûr Mehmed cevâbında târih-i i‘lâmdan altı sene mukaddem müdde‘î-i mesfûr Aleksan zimmî ile meblağ-ı mezbûr yirmi buçuk guruş da‘vâsından bâ-vesâtet-i muslihîn on beş guruş bedel-i makbûza sulh olup husûs-ı mezkûra müte‘allika âmme-i da‘vâdan herbirimiz âharın zimmetini ibrâ-i âmm-ı kātı‘u’n-nizâ‘ ve râfi‘u’l-hısâm ile ibrâ ve ıskāt etmişidik deyü ba‘de’d-def‘ ve’l-inkâr mezbûr Mehmed’den def‘-i mezkûrunu çubukçu tâifesinden el-Hâc İbrahim b. Hüseyin ve Mehmed b. Ali şehâdetleriyle merkūm Aleksan zimmî muvâcehesinde vech-i şer‘î üzere isbât etmeğin mûcebiyle merkūm Aleksan zimmî da‘vâ-yı mezkûresiyle mezbûr Mehmed’e bî-vech-i şer‘î mu‘ârazadan men‘ olunduğu huzûr-ı âlîlerine i‘lâm olundu. Fî 14 min-Rebî‘ülevvel sene 1162