Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 112 Hüküm no: 38 Orijinal metin no: [6b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terzi Delvet v. Pedros’un ferace dikmek için alıp başkasına rehin verdiği çuka bedelini Fâtıma bt. Mehmed’e ödemesi Ma‘rûz Zât-ı ta‘rîf-i şer‘î ile mu‘arrefe olan sahibe-i arzuhâl Fâtıma bt. Mehmed nâm hatun meclis-i şer‘-i şerîf-i enverde derûn-ı arzuhâlde mezkûr Derzi Delvet v. Pedros nâm zimmî muvâcehesinde mesfûr Derzi Delvet zimmî târih-i i‘lâmdan on yedi ay mukaddem bana ferâce dikivermek için malımdan ve yedimden ahz u kabz eylediği sekiz guruş bir rub‘ guruş kıymetli üç zirâ‘ neftî çukamı âhara rehinle izâ‘at etmekle zikrolunan çuka kıymet-i mezkûresini taleb ederim deyü ba‘de’d-da‘vâ ve’s-suâl mesfûr terzi zimmî dahi cevâbında kazıyye bi-tamamihâ minvâl-i muharrer üzere olduğunu ikrâr ve i‘tirâf etmeğin alâ-mûceb-i i‘tirâfihî zikrolunan çukanın kıymeti olan meblağ-ı mezbûr sekiz guruş bir rub‘ guruşu müdde‘i[ye]-i mezbûre Fâtıma Hatun’a edâ ve teslîmle merkūm Delvet zimmîye tenbîh olunduğu Mahkeme-i bâb’da tescîl ve huzûr-ı âlîlerine i‘lâm olundu. Fî 19 min-şehri Rebî‘ülevvel sene 1162