Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 112 Hüküm no: 39 Orijinal metin no: [6b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yumurtacı İbrahim Ağa b. Mustafa ile Çukacı Sakızlı Luki v. Mikel’in alacak davasıyla Kostantin’e açtıkları davada Kostantin’in iflas ettiğinden ödemesi için mühlet verildiği İflâs Ma‘rûz Sahib-i arzuhâl Kostantin zimmînin derûn-ı arzuhâlde mezkûr dâyinlerinden Yumurta[cı] İbrahim Ağa b. Mustafa nâm kimesne ile Çukacı Sakızlı Luki v. Mikel zimmî meclis-i şer‘-i enverde merkūm Kostantin zimmîden muvâcehe mezbûr İbrahim Ağa cihet-i karzdan on sekiz guruş ve mesfûr Çukacı Sakızlı Luki zimmî dahi cihet-i [karzdan] seksen yedi guruş hakkımız vardır taleb ederiz deyü da‘vâ ve merkūm Kostantin zimmî dahi cevâbında fi’l-vâki‘ müdde‘iyân-ı mezkûrândan herbirine cihet-i mezkûreden zimmetinde ol kadar deyni olduğunu ikrâr ancak işbu arzuhâl derkenârında mezkûr olduğu üzere Hacı Veli nâm kimesnenin seksen sekiz guruş ve Ömer Yazıcı nâm kimesnenin otuz sekiz guruş ve Hacı Ömer nâm kimesnenin yüz dokuz guruş deynleri’çün dört buçuk ay ba‘de’l-habs yedinde bulunan malımın cümlesini ahz ve beynlerinde alâ-vechi’l-guramâ iktisâm etmeleriyle hâlâ üzerimde lâbis olduğum köhne libâsımdan gayri ism-i mâl ıtlâk olunur nesnem yokdur deyü fakīr ve mu‘sir ve mu‘dim olduğunu ikr[ar] ve müdde‘âsını hâline vukūfu olan bî-garaz sikāt-ı Müslimînden Mehmed b. Hüseyin ve Molla Mehmed b. İshak ve es-Seyyid Mehmed b. es-Seyyid Ali nâm kimesnelerin alâ-tarîkı’ş-şehâde ihbârlarıyla mezbûrân İbrahim Ağa ve Çukacı Sakızlı Luki muvâcehelerinde beyân etmeğin müdde‘iyân-ı mezbûrân dahi medyûn-ı merkūm Kostantin zimmînin el-yevm mu‘sir ve mu‘dim olduğunu herbiri ikrâr ve i‘tirâf edip deyn-i mezkûrları mutâlebesini vakt-i yesârına tevkīf etmeleriyle zimmî-i mezkûra vakt-i meyseretine değin şer‘an habs iktizâ etmediği bâbında [Bâb] Mahkemesi’nden huzûr-ı âlîlerine i‘lâm olundu. Fî 21 Rebî‘ülevvel sene 1162