Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 114 Hüküm no: 42 Orijinal metin no: [7a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arab Ahmed b. Hüseyin’in Sarıgörez hamamında parasının çalındığı iddiasıyla hamam sahibi ve çalışanlarına açtığı davayı ispat edemediği Ma‘rûz Bâ‘is-i i‘lâm Arab Ahmed b. Hüseyin meclis-i şer‘-i enverde Sarıgörez hamamında sükkân-ı nâtırlar olan Arab Hacı Abdullah b. Osman ve Kahveci Süleyman b. Ömer ve Aziz b. Osman ve dellâklar olan Yakub b. Ali ve Hasan b. Mehmed ve Mehmed b. Mustafa ve Mustafa b. Mehmed ve Hasan b. Mehmed ve Muharrem b. Hüseyin ve İbrahim b. Ömer ve Hüseyin b. Süleyman ve Halil b. Mehmed ve Mustafa b. Veli nâm kimesneler ile Kafesci İvaz v. Kirkor ve Esber v. Avdik zimmîler muvâcehelerinde hamam-ı mezkûr hamamcısı el-Hâc Hüseyin b. el-Hâc Süleyman dahi hazır olduğu hâlde târih-i i‘lâmdan üç gün mukaddem hamam-ı mezkûr câmekânında nâtırlarından işbu Arab Hacı Abdullah’ın ta‘yîn eylediği mahâlde soyunup ol mahalle libâsımı vaz‘ edip ba‘dehû hamama duhûl ve iğtisâl edip çıkdığımda libâsımın koyun cebinde olan elli buçuk guruşumu nehb ve ahz etmişlerdir hâlâ sükkân-ı mezkûrûna suâl meblağ-ı mezkûru bana red ve teslîmlerine tenbîh taleb ederim deyü ba‘de’d-da‘vâ ve’l-inkâr müdde‘î-i mezbûr müdde‘âsını beyândan ızhâr-ı acz ile istihlâf eyledikde sükkân-ı mezkûrûndan herbiri vefkı’l-mesûl half billâhi’l-a‘lâ etmeğin mûcebiyle müdde‘î-i mezbûr bilâ-beyyine da‘vâ-yı mezkûresiyle sükkân-ı mezkûrûna bî-vech-i şer‘î mu‘ârazadan men‘ olunduğu Mahkeme-i Bâb’da tescîl ve huzûr-ı âlîlerine i‘lâm olundu. Fî 24 Rebî‘ülevvel sene 1162