Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 115 Hüküm no: 43 Orijinal metin no: [7a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgancı Mahmud Çelebi b. Hüseyin’in İbrahim Ağa b. Solak Hacı Mustafa b. Ali ile olan alacak davasında sulh olduğu Ma‘rûz Yorgancı esnâfından sahib-i arzuhâl Mahmud Çelebi b. Hüseyin meclis-i şer‘-i enverde esnâf-ı mezkûreden derûn-ı arzuhâlde mezkûr İbrahim Ağa b. Solak Hacı Mustafa b. Ali tarafından husûs-ı âti’z-zikre vekîl olduğu Mustafa b. Ömer ve Mehmed b. Ahmed şehâdetleriyle sâbit olan Hacı Hüseyin b. Hasan muvâcehesinde mukaddemâ müvekkil-i mezbûr İbrahim Ağa bana malından dört yüz otuz guruşluk yorgancılar metâ‘ı bey‘ ve teslîm ve yetmiş guruş dahi nakden karz vermek üzere yedimden beş guruşa bir kıt‘a deyn temessüğü almağ[l]a zikrolunan yetmiş guruş bana def‘ ve teslîm etmiş değil iken yedimden aldığı temessüğüm mantûkunca beş yüz guruşu benden tamamen ahz etmekle ben dahi izdiyâd aldığı yetmiş guruşu hâlâ taleb ve istirdâd ederim deyü da‘vâya tesâddî etmişidim el-hâletü hâzihî da‘vâ-yı mezkûremden bâ-vesâtet-i muslihîn müvekkil-i mezbûr İbrahim Ağa ile yirmi iki guruş bedel-i makbûz üzerine sulh olup mâ‘adâsına ve husûs-ı mezkûra müte‘allika âmme-i da‘vâdan müvekkil-i mezbûr İbrahim Ağa’nın zimmetini ibrâ ve ıskāt eyledim deyü olan ikrâ[rı]nı vekîl-i mezbûrun tasdîk eylediği Mahkeme-i Bâb’dan huzûr-ı âlîlerine i‘lâm olundu. Fî 25 Rebî‘ülevvel sene 1162