Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 117 Hüküm no: 47 Orijinal metin no: [7b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Beşe b. Mustafa’nın Uncu Kalos v. Aleksan ile ortağı David v. Mardiros’a olan borcunu ödeyip rehin bıraktığı eşyalarını geri alması Ma‘rûz Mahmiye-i İstanbul’da uncu tâifesinden Kalos v. Aleksan ve şerîki David v. Mardiros zimmîler meclis-i şer‘-i enverde çörekçi tâifesinden Muhzır Ali mübâşeretiyle ihzâr-ı şer‘ olunan Hüseyin Beşe b. Mustafa muvâcehesinde mezbûr Hüseyin Beşe zimmetinde mukaddemâ mal-ı şirketimizden ve yedimizden iştirâ ve kabz eylediği ma‘lûmü’l-mikdâr un semeninden işbu yedimizde verdiği bir kıt‘a temessüğü mantûkunca yüz seksen guruş ve hâric ez-temessük dokuz buçuk guruş ki cem‘an yüz seksen dokuz buçuk guruş hakkımız olup meblağ-ı mezbûr mukābelesinde yedinde mülkü olup mahmiye-i mezbûrede Silivrikapısı dâhilinde vâki‘ küçük çörekçi fırınında olan nühâsiye ve gayr-ı nühâsiye kürekçilik âlât-ı ma‘lûmesinden nısf hissesini bi-tarîkı bey‘i’l-vefâ rehin vaz‘ etmişidi hâlâ deyn-i mezkûrunu edâ ile rehn-i mezkûrunu fek ve istihlâs ve ahzına tenbîh taleb ederiz deyü ba‘de’d-da‘vâ ve’s-suâl mezbûr Hüseyin Beşe cevâbında fi’l-vâki‘ kazıyye minvâl-i muharrer üzere olduğunu ikrâr ve i‘tirâf etmeğin alâ-mûceb-i i‘tirâfihî deyn-i mezkûru olan yüz seksen dokuz buçuk guruşu müdde‘iyân-ı mesfûrâna edâ ve teslîmle rehn-i mezkûrunu fek ve istihlâs ve geriye ahzıyla mezbûr Hüseyin Beşe’ye tenbîh olunduğu Mahkeme-i Bâb’da tescîl ve huzûr-ı âlîlerine i‘lâm olundu. Fî 28 Rebî‘ülevvel sene 1162