Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 117 Hüküm no: 46 Orijinal metin no: [7b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koltukçu Ömer ve hizmetçisi Mehmed b. Hasan ile Mehmed Beşe arasındaki eşya alacakları davasında sulh olup birbirlerinin zimmetlerini ibra ettikleri Ma‘rûz Muhzır Süleyman mübâşeretiyle Bâb Mahkemesi’ne ihzâr olunan Koltukçu Ömer’in hasmı Mehmed Beşe meclis-i şer‘-i hatîrde mezbûr Ömer mahzarında târih-i i‘lâmdan yirmi beş gün mukaddem hizmetkârım işbu hazır bi’l-meclis diğer Mehmed b. Hasan yedinden eşyâ-i memlûkemden mecmû‘u yüz on yedi guruş kıymetli iki mavi çuka şalvar ve iki çuka nîmten ve bir yeşil çuka biniş ve bir sîm zencirli çuka biniş ve bir telli sakız kuşağı ve bir siyah kuzu kürkü ve bir Karacalar şalı ve bir çuka dolamamı bi-gayr-ı hakkın ahz u kabz eyleyip mukābelesinde ancak mecmû‘u elli üç buçuk guruş kıymetli bir keremsûda kaplı sincab kürk ve bir çuka dolama ve bir Şam alacası entâri ve bir çuka biniş ve bir Hama kuşağı ve bir çuka çakşır teslîm eylediği eşyâsını mezbûr diğer Mehmed yedinde mevcûd olmağla red ve benim eşyâ-i mezkûrelerim mevcûde ise a‘yânını müstehleke ise ba‘de’s-sübût kıymet-i şer‘iyelerini mezbûr Ömer’den taleb ederim deyü ba‘de’d-da‘vâ ve’s-suâl mezbûr Ömer kazıyye minvâl-i muharrer üzere olduğunu ba‘de’l-ikrâr tavassut-ı muslihîn ile mârrü’z-zikr eşyâlarımdan iki çuka biniş ve bir çuka dolama ve bir mor çuka nîmtenimi bana teslîm edip mâ‘adâ eşyâlarına müte‘allika âmme-i da‘vâdan mezbûr Ömer’in zimmetini ibrâ ve ıskāt eylediğimde ol dahi kezâlik eşyâ-i mezkûrelerine müte‘allika âmme-i da‘vâdan benim ve hizmetkârım mezbûr diğer Mehmed’in zimmetlerimizi ibrâ ve ıskāt eyleyip bu vechile kat‘-ı nizâ‘ eyledik deyü olan ikrârını ba‘de’t-tasdîk tescîl huzûr-ı âlîlerine i‘lâm olundu. Fî 26 şehri Rebî‘ülevvel sene 1162