Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 118 Hüküm no: 49 Orijinal metin no: [7b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb bt. Abdullah’ın mehir ve nafaka bedelinden olan alacağını boşandığı kocası Ahmed b. Mehmed’in ödemesi Ma‘rûz Muhzır Ali mübâşeretiyle Bâb Mahkemesi’ne ihzâr olunan Ahmed b. Mehmed’in hasmı ve zevce-i mutallakası Zeyneb bt. Abdullah nâm hatun zâtı ba‘de’t-ta‘rîfi’ş-şer‘î meclis-i şer‘-i hatîrde mezbûr Ahmed mahzarında mezbûr Ahmed zevcim olup târih-i i‘lâmdan bir ay mukaddem beni bâyinen tatlîk ve mukaddemâ dahi iki def‘a bâyinen tatlîk etmekle her def‘ada bin altı yüz yirmişer akçeden üç def‘ada zimmetinde mütekarrer ve ma‘kūdün-aleyh olan dört bin sekiz yüz altmış akçe mehr-i müeccelim ile nafaka-i iddet ve meûnet-i süknâm için dahi bi’t-terâzî ta‘yîn olunan altı yüz akçe ki cem‘an beş bin dört yüz altmış akçe hakkımı mezbûrdan taleb ederim deyü ba‘de’d-da‘vâ ve’s-suâl mezbûr Ahmed cevâbında kazıyye müdde‘iye-i mezbûrenin takrîr-i meşrûhu üzere olduğunu ikrâr ve i‘tirâf etmeğin mûcebince meblağ-ı mezkûr beş bin dört yüz altmış akçeyi müdde‘iye-i mezbûreye edâ ve teslîme mezbûr Ahmed’e tenbîh olunmuşdur. Fî 28 Rebî‘ülevvel sene 1162