Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 119 Hüküm no: 50 Orijinal metin no: [8a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asiye bt. Hacı Ahmed’in cariyesi Fâtıma’yı haksız yere alıp başkalarına satan Tepeli Fâtıma’nın cariyenin kendisini veya bedelini iade etmesi Ma‘rûz Sahibe-i arzuhâl Asiye bt. Hacı Ahmed nâm hatun Mahkeme-i Bâb’da meclis-i şer‘de derûn-ı arzuhâlde mezkûreti’l-ism Tepeli demekle ma‘rûfe Arab Fâtıma nâm hatun muvâcehesinde târih-i i‘lâmdan otuz üç gün mukaddem İstanbul’da Esirpazarı derûnunda bey‘a arz için tahta üzerine vaz‘ eylediğim yüz otuz beş guruş kıymetli bir re’s Zenciyyetü’l-asl Fâtıma nâm bikr-i câriye-i memlûkemi mezbûre Tepeli Fâtıma bi-gayr-ı hakkın ahz ve tağyîb eylediğinden sonra on üç gün mürûrunda işbu hazır bi’l-meclis derûn-ı arzuhâlde mastûr Fındık demekle ma‘rûf Arab Ali’nin Silivrikapısı kurbünde vâki‘ sâkin olduğu menzilde mezbûre Tepeli Fâtıma bana beş altın ver senin zâyi‘ olan Arab câriyen bendedir sana vereyim deyü şuhûd mahzarında ikrâr ve i‘tirâf etmekle mârrü’z-zikr Arab câriyemin mevcûde ise aynını müstehlek ise ba‘de’s-sübût kıymet-i şer‘iyesini mezbûre Tepeli Fâtıma’dan taleb ederim deyü ba‘de’d-da‘vâ ve’l-inkâr müdde‘iye-i mezbûre Asiye Hatun ber-vech-i muharrer müdde‘âsını lede’t-tezkiye şehâdetleri makbûle olan Abdurrahim b. Halil ve Ahmed Efendi b. Ali nâm kimesneler şehâdetleriyle mezbûre Tepeli Fâtıma muvâcehesinde vech-i şer‘î üzere ba‘de’l-isbât ve’l-kabûl mezbûre Tepeli Fâtıma dahi Eyüb’de sâkin <<İsmail>> ismi ma‘lûmum olmayan dîvân efendisinin mu‘takalarından Arab Rahime ile ma‘an câriye-i mezkûreyi İstanbul’da Yemiş İskelesi’nde bulup ahz ve getirip mârrü’z-zikr dîvân efendisinin menziline vaz‘ eyledik deyü ikrâr ve i‘tirâf etmeğin mûcebiyle zikrolunan câriye-i mezkûre diğer Fâtıma’yı mevcûde ise aynını ve müstehleke ise kıymet-i sâbitesini müdde‘iye-i mezbûre Asiye Hatun’a teslîme mezbûre Tepeli Fâtıma’ya tenbîh olunduğu huzûr-ı âlîlerine i‘lâm olundu. Fî 29 Rebî‘ülevvel sene 1162