Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 132 Hüküm no: 69 Orijinal metin no: [10b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçıvan Yuvan v. Niko’nun, Ergili Kostantin Reis’te olan alacağına kefil olduğu iddiasıyla Uzun Yorgi v. Yanaki’ye açtığı davanın reddedildiği Ma‘rûz Sahib-i arzuhâl Bahçıvan Yuvan v. Niko meclis-i şer‘-i enverde arzuhâlde mezkûr Uzun Yorgi v. Yanaki zimmî muvâcehesinde işbu merkūm Uzun Yorgi benim gāib ani’l-beled Ergili Kostantin Reis zimmetinde cihet-i deyn-i şer‘îden olan yüz kırk dört buçuk guruş hakkımın kefîli olmağla meblağ-ı mezkûru ber-mûceb-i kefâlet-i mezkûre merkūm Uzun Yorgi’den taleb ederim deyü olan da‘vâsında merkūm Uzun Yorgi deyn-i kefâlet-i mezkûreleri külliyyen inkâr edip ve müdde‘î-i mesfûr dahi medyûn-ı mekfûlün-anh olan Kostantin Reis’in babası ismini bilmemekle da‘vâsı sahîha olmayıp bî-vech-i şer‘î merkūm Uzun Yorgi’ye mu‘ârazadan men‘ olunduğu Mahkeme-i Bâb’dan huzûr-ı âlîlerine i‘lâm olundu. Fî 8 Rebî‘ülâhir sene 1162