Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 131 Hüküm no: 68 Orijinal metin no: [10b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacce Gülbûy, Hacce Hüsnişah, Fâtıma ve Gülfem hatunların, alacakları olduğu iddiasıyla Fatma Hatun’a açtıkları davayı ispat edemediklerinden davalarının reddedildiği Ma‘rûz Sahibe-i arzuhâl Fâtıma Hatun Mahkeme-i Bâb’da meclis-i şer‘de derûn-ı arzuhâlde mezkûreti’l-ism olup zâtı ta‘rîf-i şer‘î ile mu‘arrefe olan diğer Fâtıma’dan eşyâ-i memlûkemden yirmi guruş kıymetli iki donluk Hind hâssası beyaz bez ve beş guruş kıymetli nısf top gülbila ta‘bîr olunur güvez kumaş ve beş guruş kıymetli bir yeşil çuka ferâceyi ve mezbûre zimmetinde menzil icâresinden iki guruş ve çizme akçesinden bir guruş ve Hâcce Gülbûy bt. Abdullah dahi yirmi guruş kıymetli iki top sûreti alacayı ve Hâcce Hüsnişah bt. Abdullah dahi on sekiz guruş kıymetli bir top bürüncük bezi ve Gülfem bt. Abdullah dahi yirmi guruş kıymetli bir münakkaş şâl entâri ve bir buçuk guruş kıymetli bir köhne alaca entâriyi târih-i i‘lâmdan üç ay mukaddem zikrolunan eşyâlarımızı âhara bey‘ için mezbûre diğer Fâtıma’ya def‘ ve teslîm eyledik deyü mezbûrâtdan herbiri ba‘de’d-da‘vâ ve’s-suâl mezbûr[e] diğer Fâtıma menzil icâresinden iki guruş ve çizme akçesinden bir guruş ki cem‘an üç guruş mezbûre Fâtıma’ya zimmetimde deynimdir deyü ikrâr mâ‘adâ müdde‘âlarını bi’l-külliye inkâr edicek müdde‘iyât-ı mezkûrât ber-vech-i muharrer müdde‘âlarını isbâta kādireler olmamağın talebleriyle mezbûre diğer Fâtıma tahlîf olunmağın mûcebiyle mezbûre diğer Fâtıma’nın ikrârı olan üç guruşu mezbûre Fâtıma’ya edâ ve teslîme ba‘de’t-tenbîh müdde‘iyât-ı mezkûrât Fâtıma ve Hâcce Gülbûy ve Hüsnişah ve Gülfem ber-vech-i muharrer da‘vâlarından bilâ-beyyine bî-vech mu‘ârazadan men‘ olundukları Mahkeme-i Bâb’dan huzûr-ı âlîlerine i‘lâm olundu. Fî 7 min-Rebî‘ülâhir sene 1162