Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 360 Hüküm no: 528 Orijinal metin no: [78b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe’nin yün bahasından borcu olduğu Medîne-i Üsküdar’da debbâğ tâifesinden işbu râfi‘u’l-kitâb Mehmed Beşe b. Ahmed mahfil-i kazâda Yahud tâifesinden olup Senyora cemâ‘atinden olan Arslan v. Kemal muvâcehesinde üzerine da‘vâ edip mezbûr Arslan zimmetinde yedinden müşterâ ve makbûz vezn ve mikdârı beynimizde ma‘lûm koyun yünü bahâsından kırk beş bin dört yüz akçe hakkım olup meblağ-ı mezbûrdan on bir bin akçesin ahz ve istîfâ edip otuz dört bin dört yüz akçesi zimmetimde kalmağın suâl olunup alıverilmesi matlûbumdur dedikde gıbbe’s-suâl mezbûr A[r]slan cevâbında fi’l-hakīka vech-i muharrer üzere müdde‘î-i mezbûra yün bahâsından beş bin dört yüz akçe deynim olup meblağ-ı mezbûrdan on bir bin akçesin îfâ ve teslîm edip otuz dört bin dört yüz akçesi zimmetimde bâkī edâsı lâzım deynimdir deyü bi-tav‘ihi ikrâr u i‘tirâf eyledikde ikrârı mûcebince meblağ-ı bâkī otuz dört bin dört yüz akçenin edâsı’çün mezbûr A[r]slan’a ba‘de’t-tenbîh mâ-vaka‘a bi’t-taleb ketb olundu. Hurrire fi’l-yevmi’r-râbi‘ ve’l-ışrîn min-Zilhicceti’ş-şerîfe li-sene erba‘a ve sittin ve elf. Şuhûdü’l-hâl: Himmet Beşe b. Mehmed, Nuri Beşe b. Halil, Ahmed b. Mustafa, Yusuf b. Abdullah, Mehmed b. Süleyman Üsküdar’da ve gayruhum.