Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 359 Hüküm no: 527 Orijinal metin no: [78a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zakıra bt. Kiryako’nun gece ile evine giren Yorgi’nin eşkıyadan olduğu ve mahallede herkesi rahatsız ettiği Husûs-ı âti’z-zikrin mahallinde görülmesi için bi’t-taleb irsâl olunan mevlânâ Abdulkādir Efendi mahmiye-i İstanbul’da hadîka-i hâsda vâki‘ Sinan Paşa Köşkü’nde bekçi olan İbrahim Bey’in odasına varıp zeyl-i kitâbda mastûrü’l-esâmî olan Müslimîn huzûrlarında akd eylediği meclis-i şer‘-i şerîfde Üsküdar kazâsına tâbi‘ Kuzguncuk nâm karyede sâkine işbu bâ‘isetü’r-rakīm Zakıra bt. Kiryako yine karye-i mezbûrede sâkin Yorgi v. Franko nâm zimmîyi bi’l-fi‘il hâssa bostancıbaşı olan iftihârü’l-emâcid ve’l-ekârim câmi‘ü’l-mehâmid ve’l-mekârim Hasan Ağa -zîde kadruhu- mu‘âveneti ile ihzâr ve üzerine da‘vâ edip mezbûr Yorgi târîh-i kitâbdan üç gün mukaddem Pazar gecesi karye-i mezbûrede sâkine olduğum menzilimi taşlayıp ertesi vakt-i zuhrda evime gelip ben aşağı odada iken beni yukarda kapamak edip yukarı odama varıp kilidin bozup içeri girdikde ben istigāse etmekle subaşı gelip mezbûru evimde iken ahz eyledi, suâl olunup mûcebi icrâ olunmak matlûbumdur dedikde gıbbe’s-suâl ve akībe’l-inkâr müdde‘iye-i mezbûreden da‘vâsına mutâbıka beyyine taleb olundukda Aleksandre v. Nikola ve Kirkor v. Mano nâm zimmîler li-ecli’ş-şehâde hâzırân olup istişhâd olunduklarında fi’l-hakīka müdde‘iye-i mezbûre ol gün evime âdem geldi deyü istigāse eyledikde biz varıp mezbûr Yorgi’yi merkūme Zakıra’nın evinde gördük hattâ subaşı bizim huzûrumuzda ahz eyledi, mezbûr Yorgi müdde‘iye-i mezbûre Zakıra’nın evine girdiğine biz şâhidleriz şehâdet dahi ederiz deyü herbiri edâ-yı şehâdet-i şer‘iyye eylediklerinde karye-i mezbûre ahâlîsinden Beyko v. Yani ve Yorgi v. Todori ve Damastoş v. Kanos ve Mostodos v. Zahiro ve Yorgi v. Alekis ve Yanaki v. İstimad ve Todori v. Kosta ve Yani v. Manol ve Andriya v. Todori ve sâirleri nâm zimmîler dahi meclis-i mezbûra hâzirûn olup mezbûr Yorgi kendi hâlinde olmayıp dâimâ gece ile gezip herbirimizi rencîde ve remîde etmekden hâlî değildir, mezbûrdan birimiz râzı değiliz, eşkıyâdandır deyü bi’l-muvâcehe haber verdiklerinde vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Mehmed b. Abdullah ile gelip vukū‘u üzere inhâ ettiklerinde şâhidân-ı mezbûrânın şehâdetleri dahi ba‘de’t-ta‘dîl ve’t-tezkiye makbûle olmağın mâ-vaka‘a bi’t-taleb ketb olundu. Hurrire fi’l-yevmi’s-sâlis ve’l-ışrîn min-Zilhicceti’ş-şerîfe li-sene erba‘a ve sittin ve elf. Şuhûdü’l-hâl: İbrahim Bey b. Durak, Haseki İsmail Bey, Tekyeci? Mustafa Bey el-bostanî, Mustafa Halîfe b. Ahmed, Ahmed b. Abdullah, Osman Bey el-bostanî ve gayruhum.