Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 133 Hüküm no: 71 Orijinal metin no: [10b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asvador v. Serkiz’in haberi olmadan oğlu Ahmed tarafından Kirkor v. Oseb’e satılan inci yakalığının geri verilmesi talebiyle açtığı davada on iki kuruşa sulh olduğu Ma‘rûz Derûn-ı arzuhâlde mezkûr Asvador v. Serkiz bi’t-terâzî Mahkeme-i Bâb’da meclis-i şer‘de haffâf eskicilerinden sahib-i arzuhâl Kirkor v. Oseb muvâcehesinde merkūm Asvador’un sulbî kebîr oğlu mühtedî Ahmed nâm kimesne dahi hazır olduğu hâlde bundan akdem işbu Kirkor zimmetinde oğlum işbu hâzır-ı mezbûr Ahmed malımdan iki yüz guruş kıymetli on dal inci yakalığımı benim izin ve haberimsizin sana otuz beş guruş semen-i makbûza fuzûlen bey‘ ve teslîm etmekle ben dahi bey‘-ı mezkûru mücîz olmamağın zikrolunan yakalığı merkūm Kirkor’dan taleb ve istirdâd eylediğimde ol dahi külliyyen inkâr edip ol vechile beynimizde ba‘de vukū‘ı’l-münâza‘ât bâ-vesâtet-i muslihîn [11a] müdde‘â-yı mezkûrumdan merkūm Kirkor zimmî ile an-inkâr on iki guruş bedel-i makbûza sulh olup zikrolunan yakalığa müte‘allika âmme-i da‘vâdan merkūm Kirkor’un zimmetini ibrâ ve ıskāt eyledim deyü olan ikrârını merkūm Kirkor’un tasdîk eylediği mahkeme-i mezkûrede tescîl ve huzûr-ı âlîlerine i‘lâm olundu. Fî 7 Rebî‘ülâhir sene 1162