Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 134 Hüküm no: 72 Orijinal metin no: [11a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aliye bt. İbrahim’in kendisine küfür ettiği iddiasıyla Rukiye bt. Süleyman’a açtığı davada Rukiye’nin bir daha küfretmemek ve sataşmamaya söz vermesi üzerine sulh oldukları Ma‘rûz İstanbul’da Beyceğiz mahallesi sâkinelerinden ve zâtı zevci Ahmed b. Hasan ve Ali b. Halil ile mu‘arrefe olan Aliye bt. İbrahim nâm hatun meclis-i şer‘-i enverde Mumcu Mustafa Beşe mübâşeretiyle ihzâr olunan Rukiye bt. Süleyman muvâcehesinde mezbûre Rukiye târih-i i‘lâmdan iki gün mukaddem bana mûceb-i ta‘zîr olan elfâz ile şetm eyledi mûceb-i şer‘îsini taleb ederim deyü ba‘de’d-da‘vâ ve’l-inkâr müdde‘iye-i mezbûre Aliye Hatun müdde‘âsını ahrâr-ı Müslimînden es-Seyyid el-Hâc Üveys b. el-Hâc Osman nâm kimesne ile Âişe bt. Abdullah ve Emine bt. Mehmed nâm hatunlar şehâdetleriyle mezbûre Rukiye muvâcehesinde vech-i şer‘î üzere isbât edip şühûd-ı mezkûrûnu tezkiye esnâsında iken beynlerine tavassut edip müdde‘iye-i mezbûreyi müdde‘â-aleyhâ-yı mezkûre Rukiye fîmâ-ba‘d kendi hâlinde olup yed ve lisânıyla müdde‘iye-i mezbûreye te‘addî ve tecâvüz etmemek üzere beynlerini ıslâh eylediklerinde müdde‘iye-i mezbûre dahi sulh-ı mezkûru kabûl edip ol vechile kat‘-ı nizâ‘ ettikleri Mahkeme-i Bâb’da tescîl ve huzûr-ı âlîlerine i‘lâm [olundu] Fî 10 Rebî‘ülâhir sene 1162