Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 140 Hüküm no: 82 Orijinal metin no: [12a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman’ın, babası Çörekçi Mustafa b. Hüseyin’den kiralayıp daha sonra kira anlaşması iptal edilen fırın ve aletlerinden dolayı olan alacaklarını taksitler halinde babasından almak şartıyla anlaştıkları Bâ-mühr-i hazret-i efendi Ma‘rûz Sahib-i arzuhâl Süleyman meclis-i şer‘de babası Çörekçi el-Hâc Mustafa b. el-Hâc Hüseyin mahzarında bundan esbak babam mezbûr Lâleliçeşme kurbünde vâki‘ tasarrufunda olan çörekçi fırınını ve derûnunda mevcûd âlât-ı ma‘lûmesini benim zevcemi ve evlâdımı kendi beslemek şartıyla beher yevm ellişer para icâre ile bana îcâr ve ben dahi ber-minvâl-i muharrer ba‘de’l-istîcâr yirmi dört ay beher yevm ellişer parayı babam mezbûra vermişidim lâkin şart-ı mezkûr ile îcâr ve istîcarımız fâsid olup fırın-ı mezkûrun ve âlât-ı ma‘lûmenin dahi ecr-i misli ancak yevmiye yirmişer para olmakla medfû‘umun ecr-i mislinden ziyâdesini istirdâd ederim deyü tesâddî eylediğim da‘vâdan babam mezbûr ile bâ-vesâtet-i muslihîn yüz elli guruş bedel mukābelesinde sulh olup ve bundan akdem firâr ve gaybet eylediğim vakitde bâ-defter ve bâ-hüccet-i şer‘iye eşyâ-i memlûkemden babam mezbûrun makbûzu olan eşyâ-i ma‘lûme semenlerinden zimmetinde olan yedi yüz altmış yedi guruş hakkıma bedel-i mezkûr dahi zam olundukda cem‘an dokuz yüz on yedi guruş zimmetinde olan hakkımı ahz ve isti‘fâda babam mezbûru beher mâh yetmişer guruş vermek üzere bi’t-terâzî mukāssaten on üç ay tecîl ve ma‘lûmü’l-eşhâs dâyinlerime olan deynim için beher mâh yetmişer guruşu vermek üzere babam mezbûr el-Hâc Mustafa’dan istid‘â eylediğimde ol dahi kabûl ve ber-minvâl-i muharrer mukāssaten edâya müte‘ahhid olup ba‘de’l-yevm husûs-ı mezkûra ve târih-i i‘lâma gelince beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i da‘vâdan herbirimiz âharın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik dediğini babası mezbûr el-Hâc Mustafa dahi tasdîk edip bu vechile kat‘-ı nizâ‘ eyledikleri huzûr-ı âlîlerine i‘lâm olundu. Fî 12 Rebî‘ülâhir sene 1162