Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 140 Hüküm no: 81 Orijinal metin no: [12a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sima bt. Nikagos ve Maryem bt. Bağdasar’ın, bazı zinet eşyalarını çaldığı iddiasıyla Karine bt. Kestostor’a açtıkları davayı ispat edemedikleri Bâ-mühr-i hazret-i efendi Ma‘rûz Derûn-ı arzuhâlde isimleri mastûr Sima bt. Nikagos ve Maryem bt. Bağdasar nâm Nasrâniyeler şahısları ba‘de’t-ta‘rîfi’ş-şer‘î meclis-i şer‘-i hatîrde sahibe-i arzuhâl Karine bt. Kestosder nâm Nasrâniye muvâcehesinde târih-i i‘lâmdan yirmi iki gün mukaddem İstanbul’da Bâyezid Ağa mahallesinde vâki‘ menzilimiz derûnundan eşyâ-i memlûkemizden kırk guruş kıymetli bir çift altın bilezik ve yirmi iki guruş kıymetli bir altın gerdanlık ile on zer-i mahbûb ve sekiz cedîd guruşumuzu bi-gayr-ı hakkın ahz etmekle taleb ederiz deyü ba‘de’d-da‘vâ ve’l-inkâr müdde‘iyetân-ı mezbûretân ber-vech-i muharrer müdde‘âlarını beyândan ızhâr-ı acz ile istihlâf etmeleriyle gıbbe’t-tahlîfi’ş-şer‘î müdde‘iyetân-ı mezbûretân Sima ve Maryem bilâ-beyyine bî-vech-i şer‘î mu‘ârazadan men‘ olundukları huzûr-ı âlîlerine i‘lâm olundu bâkī fermân men-lehu’l-emrindir. Fî 15 min-Rebî‘ülâhir sene 1162