Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 142 Hüküm no: 84 Orijinal metin no: [12b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gemiciler Hasan Beşe b. Abdi, Murtaza Beşe b. Abdullah, Panayot, Nikola ve diğerlerinin gemisinde çalıştıkları Hacı İsmail Reis b. Hacı Abdurrahman’a açtıkları alacak davasında haksız bulundukları Ma‘rûz Mellâhîn tâifesinden ashâb-ı arzuhâl Hasan Beşe b. Abdi ve Murtaza Beşe b. Abdullah nâm kimesneler ile Panayot v. Meskol ve Nikola v. Todori ve Yani v. Dimitri ve Yorgi v. Kostantin ve Panayot v. Sava ve Drako v. Dimitri nâm zimmîler meclis-i şer‘-i enverde Unkapanı İskelesi rüesâsından arzuhâlde mezkûr el-Hâc İsmail Reis b. el-Hâc Abdurrahman muvâcehesinde mukaddemâ mezbûr el-Hâc İsmail Reis’in üç direkli ta‘bîr olunur sefînesinde talebiyle mellâhlar olup sefîne-i mezkûreyi sekiz ay hizmetle İstanbul’dan Rumeli’de Akkirman İskelesi’ne götürüp ba‘de tahmîli’z-zehâir Âsitâne’ye getirip zehâiri bey‘ ve ihrâc ile edâ-i hizmet eylediğimizde sefîne-i mezkûrenin sefer-i mezkûrunda olan ticâretinden ba‘de külli’l-hesâb hasbe’l-âde herbirimize pay ta‘bîr olunur otuz guruş ücret isâbet etmiş iken mezbûr el-Hâc İsmail Reis ücret-i mezkûremizin yirmi üçer guruşunu bizlere edâ ve teslîm ve yedişer guruşu zimmetinde bâkī kalmağla taleb ederiz deyü ba‘de’d-da‘vâ ve’s-suâl mezbûr el-Hâc İsmail Reis cevâbında fi’l-vâki‘ müdde‘ûn-ı mezkûrûn sefîne-i mezkûresinde mellâhları olup müddet-i mezkûre ber-vech-i muharrer eyledikleri hizmetlerini itmâm ettiklerini ikrâr ancak sefer-i mezkûrda müdde‘ûn-ı mezkûrûnun ba‘de külli’l-hesâb pay ta‘bîr olunur ücretleri kabzını i‘tirâf eyledikleri yirmi üçer guruş olup ziyâde olduğunu inkârından mâ‘adâ müdde‘ûn-ı mezkûrûn zikrolunan yirmi üçer guruşu kabz eyledikleri hînde sefîne-i mezkûrenin sefer-i mezkûru ticâretinden ziyâde pay ve ücretlerine müte‘allika âmme-i da‘vâdan işbu müdde‘ûn-ı mezkûrûnun herbiri benim zimmetimi ibrâ etmişleridi deyü ba‘de’d-def‘ ve’l-inkâr mezbûr el-Hâc İsmail Reis def‘-i meşrûhunu ahrâr-ı ricâl-i Müslimînden ve marangoz tâifesinden Halil Beşe b. Mehmed ve mellâhîn tâifesinden İbrahim b. Ali ve diğer İbrahim b. Ali ve Ömer Reis b. Abdullah nâm kimesneler şehâdetleri[yle] müdde‘ûn-ı mezkûrûn muvâcehelerinde ve[ch-i] şer‘î üzere ba‘de’l-isbât ve’t-ta‘dîl ve’l-kabûl mûcebiyle mellâhûn-ı müdde‘ûn-ı mezkûrûn da‘vâ-yı mezkûreleriyle mezbûr el-Hâc İsmail Reis’e bî-vech-i şer‘î mu‘ârazadan men‘ olundukları Bâb’dan huzûr-ı âlîlerine i‘lâm olundu. Fî 16 R sene 1162