Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 152 Hüküm no: 97 Orijinal metin no: [14b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Balmumu dökücü esnafının kethudası İbrahim b. Hacı Mehmed’in ferağından yerine Yusuf Çelebi b. Abdullah’ın kethuda tayini Bâ-mühr-i hazret-i efendi Ma‘rûz Derûn-ı berat-ı âlîşânda mastûr olduğu üzere rihte-gân-ı şem‘-i asel esnâfının bâ-berat-ı âlîşân kethudâları olan İbrahim b. el-Hâc Mehmed meclis-i şer‘de esnâf-ı mezkûre ihtiyârlarından Ahmed Çelebi b. Mehmed ve es-Seyyid Halil Çelebi ve el-Hâc İsmail b. Ahmed ve el-Hâc Mustafa b. el-Hâc Hüseyin ve Ahmed b. el-Hâc Süleyman ve Ebûbekir b. Mustafa ve Ali b. Abdullah ve el-Hâc Mehmed b. Abdullah ve diğer Ali b. Abdullah ve İbrahim b. Musa ve Mehmed Beşe b. el-Hâc Ali ve sâir cerîdede mazbûtü’l-esâmî ustalar hazır oldukları hâlde yine esnâf-ı mezkûre ustalarından Yusuf Çelebi b. Abdullah muvâcehesinde ben esnâf-ı mezkûrenin işbu berat-ı âlîşân ile kethudâları olup lâkin kemâ-yenbagī umûrlarını rü’yetde acz ve kusûrum olduğuna binâen bi’l-cümle esnâfımız ustalarının re’y ve ittifâkları üzerine muhtârları olan işbu Yusuf Çelebi’ye kendi hüsn ü ihtiyârımla yedimden beratımı verip kethudâlık-ı esnâf-ı mezkûreyi ferâğ ve kasr-ı yed eyledim demekle mezbûrûn ustalar dahi mukırr-ı merkūmu tasdîk ve mersûm Yusuf Çelebi muhtârları olduğunu takrîr etmeleriyle kethudâlık-ı mezkûr mezbûr İbrahim’in kasr-ı yedinden mersûm Yusuf Çelebi’ye tevcîh ve yedine berat-ı âlîşân sadaka ve ihsân buyurulmak bâbında istid‘â ve istirhâm eyledikleri huzûr-ı âlîlerine i‘lâm olundu. Fî 24 Rebî‘ülâhir sene 1162