Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 151 Hüküm no: 96 Orijinal metin no: [14a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm Hatun bt. Yusuf’un boşandıkları kocası Niğbolulu Bayrakdar Hacı Mehmed b. Ramazan’da iddia ettiği mehir ve diğer alacaklarından sadece mehir bedelinin ödenmesine yapılan tenbih Ma‘rûz Sahibe-i arzuhâl Ümmügülsüm Hatun bt. Yusuf tarafından husûs-ı âti’z-zikre vekîl olduğu İmâm Abdullah Efendi b. Mehmed ve İsmail Çelebi b. Osman şehâdetleriyle sâbit olan İbrahim Ağa b. Ebûbekir meclis-i şer‘-i enverde arzuhâlde mezkûr Niğbolulu Bayrakdâr el-Hâc Mehmed b. Ramazan muvâcehesinde mukaddemâ mezbûr Bayrakdâr el-Hâc Mehmed müvekkile-i mezbûre Ümmügülsüm Hatun’un zevc-i dâhili iken bin yüz elli dokuz senesi Şa‘bâni’l-mu‘azzamının altıncı günü vilâyeti olan Niğbolu’ya gider oldukda eğer ben işbu yevm-i zehâbımdan doksan gün tamamında dâhil olan rûz-ı Kasım günü gelip zevcem Ümmügülsüm Hatun’a mülâkī olmaz isem zevce-i mezbûre benden boş olsun deyü müvekkilem mezbûrenin talâkını ber-vech-i muharrer ta‘lîk edip târih-i mezkûrda gidip müddet-i madrûbe tamamında gelip müvekkilem mezbûreye mülâkī olmamağla müvekkilem mezbûre ber-mûceb-i ta‘lîk-ı mezkûr Bayrakdâr el-Hâc Mehmed’den boş olmağla müvekkilem mezbûrenin mezbûr Bayrakdâr el-Hâc Mehmed zimmetinde mütekarrer ve ma‘kūdün-aleyh olan beş bin akçe mehr-i müeccelini ve yine mukaddemâ müvekkilem mezbûre malından ve yedinden iktirâz ve ahz ü istihlâk eylediği iki yüz guruşunu ve yine mukaddemâ malından ve yedinden isti‘âre ve kabz eylediği altmış guruş kıymetli iki semmûr kürk ve elli guruş kıymetli bir pendül sâ‘atini mevcûde a‘yânını ve müstehleke kıymet-i mezkûrelerini bi’l-vekâle taleb ederim deyü ba‘de’d-da‘vâ ve’s-suâl mezbûr Bayrakdâr el-Hâc Mehmed cevâbında fi’l-vâki‘ müvekkile-i mezbûre ancak altı bin akçe mehr-i müeccel tesmiyesiyle zevce-i medhûlün-bihâsı olup ve târih-i mezkûrda gidip müddet-i mezkûre tamamında gelip zevcesi mezbûreye mülâkī olmadığını ikrâr lâkin ber-vech-i muharrer ta‘lîk-ı talâkı ve ziyâde-i mehri ve zikrolunan iki yüz guruş iktirâz ve ahzı ve kürk ve sâ‘ati isti‘âre ve ahzı külliyyen inkâr edicek vekîl-i müdde‘î-i mezbûr bi’l-vekâle müdde‘[â]larından ber-vech-i muharrer ta‘lîk-ı talâk-ı mezkûru ahrâr-ı ricâl-i Müslimînden lede’t-tezkiye adâletleri zâhir olan Abdullah Ağa b. el-Hâc Mehmed ve Mehmed Ağa b. Mustafa nâm kimesneler şehâdetleriyle <> mezbûr Bayrakdâr el-Hâc Mehmed muvâcehesinde vech-i şer‘î üzere ba‘de’l-isbât ve’l-kabûl mûcebleriyle hükmolunup [14b] mehr-i müeccel-i meblağ-ı mezkûr on üç bin akçeyi mutallakası müvekkile-i mezbûre Ümmügülsüm Hatun’a edâ ve teslîm ile zevc-i mutallık-ı mezkûr Bayrakdâr el-Hâc Mehmed’e tenbîh olunduğu Bâb’dan huzûr-ı âlîlerine i‘lâm olundu. Fî 22 R sene 1162