Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 153 Hüküm no: 99 Orijinal metin no: [14b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ketenci Hacı Ahmed’in harap olan evine daha önce izin verilmeyen bir oda ilave etmesine yenilenen inşaat planına uymak üzere izin verildiği Bâ-mühr-i hazret-i efendi Ma‘rûz Fermân-ı âlîlerine imtisâlen husûs-ı âti’l-beyânı mahâllinde keşf ve tahrîr için savb-ı şer‘den bi’l-iltimâs ta‘yîn olunan keşif nâibimiz müderrisîn-i kirâmdan Ruhi Mustafa Efendi dâ‘îleri hâssa mi‘mârlarından İbrahim ve el-Hâc Süleyman halîfeler ile mahmiye-i İstanbul’da Hacı Kadın Hamamı kurbünde Hızır Bey mahallesinde vâki‘ sahib-i arzuhâl Kettânî el-Hâc Ahmed’in mahâll-i nizâ‘ olan menziline varıp ahâlî-i mahalle ve gayriden cerîdede mastûrü’l-esâmî Müslimîn huzûrunda akd eylediği meclis-i şer‘de mezbûr el-Hâc Ahmed işbu mu‘âyene olunan menzilim harâba müşrif olmağla bundan akdem temelinden hedm ve tecdîde şürû‘ eylediğimde dokuz zirâ‘ irtifâ‘ ile tarh olunan heyet-i mevcûde üzerine fevkānî binâ edecek yalnız bir oda kadîmî memnû‘ olan cihânnümâ kabîlindendir deyü ba‘de’l-keşf şer‘le men‘ olunmuşidi el-hâletü hâzihî resmini tağyîr ve tarh-ı vâhid üzere zemînden on iki zirâ‘ irtifâ‘la müceddeden binâ etmek murâdımdır demekle mi‘mârân-ı mezbûrân bu sûretle mâni‘-i mündefi‘ ve tarh-ı vâhid ile on iki zirâ‘a dek binâya müsâ‘ade vardır deyü haber verdikleri keşf-i sâbıkda mi‘mâreyn-i âhareynin ihbârlarına mutâbık olmağın mûcebiyle mezbûr el-Hâc Ahmed menzil-i mezbûrun vaz‘ ve resmini tağyîr ve kānûn üzere binâsını zemînden ancak on iki zirâ‘ irtifâ‘la tarh edip ziyâdeye tecâvüzden men‘ olunduğu mevlânâ-yı mûmâ-ileyh mahâllinde keşf ve tahrîr ve ma‘an ba‘s olunan ümenâ-yı şer‘le gelip alâ-vukū‘ihî inhâ ve takrîr eylediği huzûr-ı âlîlerine i‘lâm olundu. Fî 23 Rebî‘ülâhir sene 1162