Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 154 Hüküm no: 100 Orijinal metin no: [14b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Veliyüddin Beşe b. Ali’nin, mahzenindeki eşyaları çaldıkları iddiasıyla Mustafa b. Hacı Mehmed ile Halil Beşe b. İbrahim’e açtığı davada haksız bulunduğu Ma‘rûz Derûn-ı arzuhâlde mezkûrü’l-ism Veliyüddin Beşe b. Ali meclis-i şer‘-i enverde sahib-i arzuhâl Mustafa b. el-Hâc Mehmed ile Halil Beşe b. İbrahim muvâcehelerinde târih-i i‘lâmdan kırk beş ay ve on gün mukaddem mezbûrân Mustafa ve Halil Beşe benim [gāib] ani’l-meclis Mehmed Beşe nâm kimesne ile taht-ı icâremizde olan İstanbul’da Odunkapısı dâhilinde vâki‘ mahzenimizden mecmû‘u otuz guruş kıymetli iki puşi ve bir dolama ve bir cebemizi bi-gayr-ı hakkın ahz ü gāret etmeleriyle hâlâ eşyâ-i mezkûrelerimizin mevcûde ise a‘yânını ve müstehleke ise kıymet-i mezkûresini taleb ederim deyü da‘vâ ve mezbûrân Mustafa ve Halil Beşe dahi cevâblarında eşyâ-i mezkûreyi ahzlarını külliyyen inkârlarından mâ‘adâ müdde‘î-i mezbûr Veliyüddin Beşe refîkı gāib-i mezbûr Mehmed Beşe ile husûs-ı eşyâ-i mezkûreyi işbu i‘lâm târihinden yirmi bir ay ve on gün mukaddem Ahî Çelebi Mahkemesi’nde nâibü’ş-şer‘i’l-enver fazîletlü Mustafa İffet Efendi huzûrunda benim tarafımdan vekîlim diğer Mehmed Beşe b. İbrahim ile işbu Halil Beşe’den ba‘de’d-da‘vâ ve’l-inkâr işbu müdde‘î-i mezbûr Veliyüddin Beşe ile refîkı Mehmed Beşe bâ-vesâtet-i muslihîn da‘vâ-yı mezkûrelerinden meccânen fâriğler olup husûs-ı eşyâ-i mezkûrelerine ve târih-i mürâfa‘a-i mezkûrelerine gelince sâir beynlerinde cereyân eden cemî‘ ahz u i‘tâ ve mu‘âmelât-ı şettâdan hukūk-ı ma‘lûme ve mechûleye müte‘allika âmme-i de‘âvî ve kâffe-i mutâlebâtdan benim ve işbu mezbûr Halil Beşe’nin zimmetlerimizi ibrâ-i âm ile ibrâ ve ıskāt dahi etmişleridi deyü târih-i mezkûr ile müverrah mazmûnu min-külli’l-vücûh takrîr-i meşrûhlarına mutâbık nâib-i mûmâ-ileyhin imzâ ve hâtemini hâvî bir kıt‘a hüccet-i şer‘iye ibrâzıyla eyledikleri def‘lerini müdde‘î-i mezbûr Veliyüddin Beşe dahi ikrâr ve i‘tirâf etmeğin mûcebiyle ba‘de’l-hükm müdde‘î-i mezbûr Veliyüddin Beşe da‘vâ-yı mezkûresiyle mezbûrân Mustafa ve Halil Beşe[‘ye] bî-vech-i şer‘î mu‘ârazadan men‘ olunduğu Mahkeme-i Bâb’dan huzûr-ı âlîlerine i‘lâm olundu. Fî 25 Rebî‘ülâhir sene 1162