Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 155 Hüküm no: 103 Orijinal metin no: [15a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalemtıraşçı ve bıçakcı esnafının yiğitbaşısı Salih b. Mustafa’nın esnafların şikayeti üzerine yiğitbaşılıktan azledildiği Bâ-mühr-i hazret-i efendi Ma‘rûz Ashâb-ı arzuhâl kalemtıraşcı ve bıçakcı esnâfının bâ-berat-ı âlîşân kethudâları el-Hâc Mustafa b. Hasan ve Bıçakcıbaşı Salih Çelebi b. Ahmed ve ustalarından es-Seyyid Hüseyin Çelebi ve İsmail Çelebi ve Mehmed Çelebi ve Hüseyin Çelebi ve Ali Beşe ve İbrahim Beşe ve el-Hâc Mehmed ve Mustafa Beşe ve es-Seyyid İbrahim ve Halil Beşe ve es-Seyyid İsmail ve Ömer Beşe ve Ebûbekir Beşe ve zimmî ustalardan Avanis ve Arabacıoğlu Pedros ve Manatisga ve Kadokır ve Filibos ve Artin ve Karabet ve sâir Müslim ve zimmî ustalardan otuz neferden mütecâviz kimesneler meclis-i şer‘de yiğitbaşıları olan Salih b. Mustafa muvâcehesinde işbu mezbûr yiğitbaşımız olup lâkin kendi hâlinde olmayıp fukarâ ve bî-kesânımızı hilâf-ı inhâ ile tecrîm ve tagrîm ve sâir herbirimizi lisânıyla ve vaz‘ı ile tekdîr ve ta‘cîz ve hilâf-ı nizâm-ı kadîm harekâtıyla ihtilâlimize bâ‘is olmağla mezbûr yiğitbaşılığımızdan ihrâc ve fîmâ-ba‘d esnâfımız umûruna kat‘a müdâhale etmemek üzere tenbîh olunmak matlûbumuzdur deyü herbiri mezbûr Salih’in her vechile sû’-i hâlinden teşekkî etmeleriyle mezbûr Salih yiğitbaşılıkdan ihrâc ve umûrlarına kat‘a müdâhale ve ta‘arruz etmemek üzere tenbîh olundukda ol dahi ba‘de’l-yevm kendi kâr ü kisbi ile mukayyed olup esnâf umûruna kat‘a karışmamak üzere ta‘ahhüd eylediği huzûr-ı âlîlerine i‘lâm olundu. Fî 26 Rebî‘ülâhir sene 1162