Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 156 Hüküm no: 104 Orijinal metin no: [15a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emir Buharî Zaviyesi şeyhi Seyyid Abdurrahman Efendi b. Şeyh Abdülkebir Efendi’nin Yani, Panayot ve Dimo bakkallara olan borçlarını ödemesi Ma‘rûz İstanbul’da Nakīb Hanı civârında vâki‘ bakkāl dükkânı bakkāllarından Yani v. Yorgaki ve Panayot v. Yorgaki ve Dimo v. Yanaki meclis-i şer‘-i enverde yine İstanbul’da Emir Buhârî Zâviyesi’nin bi’l-fi‘il şeyhi fahrü’s-sâlikîn fazîletlü es-Seyyid Abdurrahman Efendi b. eş-Şeyh es-Seyyid Abdülkebir Efendi tarafından husûs-ı âti’z-zikre vekîl olduğu İbrahim b. Hüseyin ve es-Seyyid el-Hâc Mehmed b. Hasan şehâdetleriyle sâbit olan İbrahim Efendi b. Halil nâm kimesne muvâcehesinde mukaddemâ malımızdan ve yedimizden iştirâ ve kabz eylediği yedimizdeki müfredât defteri mantûkunca ba‘de külli’l-hesâb zimmetinde bakkāl metâ‘ı semeninden müctemi‘ olan yetmiş bir guruş hakkımızın şeyh-i müvekkil-i mûmâ-ileyh efendi bize edâsından imtinâ‘ eder hâlâ vekîli mezbûra suâl ve müvekkil-i mûmâ-ileyhin edâsına tenbîhe taleb ederiz deyü ba‘de’d-da‘vâ ve’s-suâl vekîl-i mezbûr bi’l-vekâle cevâbında fi’l-vâki‘ müvekkili mûmâ-ileyhin müdde‘ûn-ı mesfûrûna ber-vech-i muharrer ol kadar guruş deyni olduğunu ikrâr ve i‘tirâf etmeğin mûcebiyle meblağ-ı mezbûr yetmiş bir guruşu şeyh-i müvekkil-i mûmâ-ileyhin müdde‘ûn-ı mesfûrûna edâsıyla vekîl-i mezbûra tenbîh olunduğu Bâb’dan huzûr-ı âlîlerine i‘lâm olundu. Fî 27 Rebî‘ülâhir sene 1162