Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 160 Hüküm no: 109 Orijinal metin no: [16a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Hasan, Ayşe bt. Ramazan ve Fâtıma bt. Mustafa’nın Kör Mustafa Beşe b. Hüseyin’den satın aldıkları sade yağ bedelinden kalan borçlarını ödemeleri Ma‘rûz Sahib-i arzuhâl A‘mâ Mustafa Beşe b. Hüseyin meclis-i şer‘de derûn-ı arzuhâlde isimleri mezkûr olup zâtları ta‘rîf-i şer‘î ile mu‘arrefeler olan Âişe bt. Ramazan ve Fâtıma bt. Mustafa ve diğer Fâtıma bt. Hasan nâm hatunlar muvâcehelerinde târih-i i‘lâmdan dört ay mukaddem mezbûrât Âişe ve Fâtıma ve diğer Fâtıma hatunlar semen-i meyseretleri hâsıla oldukda küllen ve ba‘zen edâ etmek üzere beher kıyyesi kırkar paraya malımdan ve yedimden iştirâ ve kabz eyledikleri altmış kıyye revgan-ı sâdenin altmış guruş semeninden sekiz guruşunu bana edâ ve elli iki guruş zimmetlerinde bâkī kalmağla taleb ederim deyü da‘vâ mezbûrât Âişe ve Fâtıma ve diğer Fâtıma hatunlar cevâblarında fi’l-vâki‘ kazıyye minvâl-i muharrer üzere olduğunu ikrâr ancak akd-i mezkûrun eceli mechûl olmağla fâsid ve revgan-ı mezkûrun beher kıyyesinin semen-i misli yirmi üçer paraya olduğu lede’ş-şer‘i’l-enver zâhir olmağla hasbe’ş-şer‘i’l-enver müdde‘î-i mezbûr revgan-ı mezkûrun semen-i mislinden ziyâde mutâlebesinden men‘ olunup ve mezbûrât Âişe ve Fâtıma ve diğer Fâtıma dahi revgan-ı mezkûrun iktizâ eden otuz dört buçuk guruş semen-i mislinden müdde‘î-i mezbûrun makbûzundan bâkī yirmi altı buçuk guruşu müdde‘î-i mezbûra edâ ve teslîmle mezbûrât Âişe ve Fâtıma ve diğer Fâtıma’ya tenbîh olunduğu Mahkeme-i Bâb’dan huzûr-ı âlîlerine i‘lâm olundu. Fî 27 R sene 1162