Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 159 Hüküm no: 108 Orijinal metin no: [15b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Mustafa b. Ebubekir’in, Hasan Ağa b. İbrahim’e sattığı Gürcü cariye Şehriban’ın hür olduğunu ispat ettiğinden bedel olarak aldığı parayı iade etmesi Ma‘rûz Sadrazam delibaşılarından Hasan Ağa b. İbrahim b. Abdullah tarafından husûs-ı âti’l-beyâna vekîl olduğu Osman b. Mustafa ve İbrahim [b.] Ali şehâdetleriyle sâbit olan Hacı Süleyman b. Ali Bâb Mahkemesi’nde meclis-i şer‘de Hacı Mustafa b. Ebûbekir muvâcehesinde târih-i i‘lâmdan dört sene mukaddem mezbûr Hacı Mustafa yedinde câriye-i memlûkesi olan orta boylu kara gözlü açık kaşlı Şehriban nâm câriyesini Gürciyyetü’l-asl olmak üzere iki yüz beş guruş semen-i medfû‘ ve makbûza müvekkilim mezbûr Hasan Ağa’ya bey‘ ve teslîm ol dahi ber-vech-i muharrer ba‘de’l-iştirâ ve’t-tesellüm müvekkilim mezbûr dahi mevsûfe-i mezbûreyi işbu hazır bi’l-meclis [16a] Ebûbekir Beşe’ye yüz elli guruş semen-i medfû‘ ve makbûza bey‘ ve teslîm ol dahi ba‘de’l-iştirâ ve’t-tesellüm mezbûr Ebûbekir Beşe dahi mevsûfe-i mezbûreyi gāib ani’l-meclis Esirci Abdülgani’ye iki yüz on beş guruş semen-i medfû‘ ve makbûza bey‘ ve teslîm ol dahi iştirâ ve tesellüm e[tti]ğinden sonra mezbûr Hacı Abdülgani dahi mevsûfe-i mezbûreyi gāib ani’l-meclis Kökcü İbrahim nâm kimesneye iki yüz yirmi guruş semen-i medfû‘ ve makbûza bey‘ ve teslîm eylediğinden sonra târih-i i‘lâmdan yirmi bir gün mukaddem mevsûfe-i mezbûre Şehriban Mahkeme-i Bâb’da meclis-i şer‘de mezbûr Kökcü İbrahim muvâcehesinde hürriyetini şühûd-ı udûl ile ba‘de’l-isbât ve’l-hükm sebîli tahliye olundukdan sonra mezbûr Kökcü İbrahim mezbûr Hacı Abdülgani’den ol dahi mezbûr Ebûbekir Beşe’den ol dahi müvekkilim mezbûr Hasan Ağa’dan herbiri semen-i mebî‘lerini bi-hükmi’l-mürâca‘a ahz u kabz etmeleriyle müvekkilim mezbûr Hasan Ağa’nın medfû‘u olup semen-i mebî‘ olan iki yüz beş guruşu mezbûr Hacı Mustafa’dan bi-hükmi’l-mürâca‘a bi’l-vekâle taleb ederim deyü da‘vâ eyledikde mezbûr Hacı Mustafa dahi cevâbında fi’l-hakīka mevsûfe-i mezbûre Şehriban’ı iki yüz beş guruşa müvekkil-i mezbûr Hasan Ağa’ya bey‘ini ikrâr lâkin mevsûfe-i mezbûre Şehriban ber-vech-i muharrer hürriyetini isbât eylediğini inkâr edicek mezbûr Süleyman ber-vech-i muharrer müdde‘âsını Molla Hüseyin b. Hacı Mehmed ve Molla Mehmed b. Ahmed nâm kimesneler şehâdetleriyle mezbûr Hacı Mustafa muvâcehesinde vech-i şer‘î üzere ba‘de’l-isbât mûcebince semen-i mebî‘ olan iki yüz beş guruşu bi-hükmi’l-mürâca‘a müvekkil-i mezbûr Hasan Ağa’ya edâ ve teslîme mezbûr Hacı Mustafa’ya tenbîh olunduğu huzûr-ı âlîlerine i‘lâm olundu. Fî 26 Rebî‘ülâhir sene 1162