Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 161 Hüküm no: 111 Orijinal metin no: [16a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haffaf esnafının, Hacı Mehmed b. Mustafa’nın kendilerine küfür ve hakaret etmeyi adet haline getirdiğinden dükkânından çıkartılıp hapsedilmesi talepleri Ma‘rûz Mahmiye-i İstanbul’da Saraçhâne kurbünde vâki‘ arasta haffâflarından ashâb-ı arzuhâl kethudâları Osman ve yiğitbaşıları İbrahim ve sâir mazbûtü’l-esâmî yirmi dört nefer ustalar meclis-i şer‘de hirfet-i mezkûreden el-Hâc Mehmed b. Mustafa muvâcehesinde mezbûr el-Hâc Mehmed kendi hâlinde olmayıp müfsid ve müzevvir ve dâimâ ibâdullâhı ta‘cîz ve şütûm-ı galîza ile şetm eylediği târih-i i‘lâm senesi şehr-i Rebî‘ülâhir’inin yirmi beşinci günü târihiyle müverrah mahfil-i şer‘iyâtda nâibü’ş-şer‘ Abdullah Efendi hâtemiyle mahtûm i‘lâm-ı şer‘î mantûkunca mezbûr el-Hâc Mehmed muvâcehesinde vech-i şer‘î üzere sâbit ve dükkânından ihrâc ve tedîb için kal‘a-bend olunmuşiken yine âdet-i müstemirresi üzere ibâdullâhı ta‘cîz ettikde hakkında olan i‘lâmı bilmez misin dediğimiz “i‘lâmınızı avratlarınızın fercine sokun” deyü cevâb verip ve cimâ‘ lafzıyla anamıza ve avratlarımıza şetm etmekle mûceb-i şer‘îsini taleb ederiz deyü ba‘de’d-da‘vâ ve’l-inkâr mezbûrûn müdde‘âlarını udûlden Ahmed b. Mustafa ve el-Hâc Hasan b. Mehmed ve Abdullah b. Hasan ve es-Seyyid Ahmed b. es-Seyyid Veliyüddin ve el-Hâc İbrahim b. el-Hâc İsmail şehâdetleriyle isbât etmeleriyle mûcebince mezbûr el-Hâc Mehmed’e ta‘zîr-i şedîd ve salâhı zâhir oluncaya değin habs-i medîd lâzım gelmişdir ve arastada vâki‘ sâkin olduğu dükkânından dahi ihrâc olunması için fermân-ı âlîleri ricâsında oldukları huzûr-ı âlîlerine i‘lâm olundu. Fî 3 Cumâdelûlâ sene 1162