Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 162 Hüküm no: 112 Orijinal metin no: [16b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahudi İsak v. Hayim’in, paçacı esnafına ait olan kasapların kestiği koyun, kuzu, keçi vesair hayvanların sakatatlarına yaptığı müdahaleden menedildiği Ma‘rûz Paçacılar esnâfının kethudâları Ali Beşe b. Mehmed ve yiğitbaşıları Mahmud Beşe b. Halil ve ustalardan Abdi Beşe b. Ebûbekir ve Mustafa b. Hüseyin ve Mehmed b. Ahmed ve Hüseyin b. İsmail ve Süleyman b. Hasan ve Abdullah Beşe b. Mustafa nâm kimesneler ile Mosi v. Mordehay ve Mosi v. Haim ve Avram v. Mosi ve Mosi v. David ve Yasef v. Yakop ve İlya v. Yasef nâm Yahûdiler meclis-i şer‘-i enverde Dergâh-ı âlî yeniçeri ocağı orta yazıcılarından Abdülkadir Efendi mübâşeretiyle ihzâr-ı şer‘ olunan İsak Yahûdî v. Hayim muvâcehesinde kasab tâifesinin zebh ettirdikleri koyun ve kuzu ve keçi ve su sığırı ve malağı ve kara sığır ve buzağının sakat ta‘bîr olunur baş ve [a]yakları ve sâiri işbu yedimizdeki hatt-ı hümâyûn-ı şevket-makrûnu hâvî fermân-ı âlî mantûkunca bizlere ta‘yîn olunmuş metâ‘ımız iken merkūm İsak Yahûdî hayvanât-ı mezkûrâtı ben zebh ederim deyü mugāyir-i fermân-ı âlî zikrolunan sakatları fuzûlî zabteder deyü mazmûnu takrîr-i meşrûhuna mutâbık bir kıt‘a emr-i âlîşân ibrâzıyla merkūm İsak Yahûdî’nin sakat-ı mezkûrdan kasr-ı yedine tenbîh taleb ederiz deyü olan da‘vâlarında merkūm İsak Yahûdî cevâbında fi’l-vâki‘ zikrolunan sakat kendinin metâ‘ı olmayıp fuzûlî aldığını ba‘de’l-ikrâr tâ‘aten li’l-emri’l-âlî fîmâ-ba‘d sakat-ı mezkûra vaz‘-ı yed etmemeğe ta‘ahhüd edip ol vechile kat‘-ı nizâ‘ ettikleri Mahkeme-i Bâb’dan huzûr-ı âlîlerine i‘lâm olundu fermân men-lehu’l-emrindir. Fî 4 Ca sene 1162