Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 167 Hüküm no: 120 Orijinal metin no: [17b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gül’ün varislerinden Pedros’un, mûrislerinin çeşitli eşya ve parasını aldıkları iddiasıyla diğer varisler Serabyon, Losik ve Asvador’a açtığı davada sulh oldukları Ma‘rûz Bundan akdem hâlike olan Gül Nasrâniye’nin verâseti sadrî oğlu Pedros zimmî ile sadriye kızları Serabyon ve Losik nâm Nasrâniyelere ba‘de’l-inhisâr arzuhâl eden mezbûr Pedros meclis-i şer‘de mezbûretân Serabyon ve Losik Nasrâniye ile merkūme Serabyon’un zevci Asvador zimmî muvâcehelerinde mezbûretân Serabyon ve Losik ve Asvador anamız hâlike-i mesfûrenin terekesinden iki yüz guruş nakid ile bir çift altın bilezik ve bir altın gerdanlık ve bir çift yâkut küpe ve bir sîm kuşak ve on iki beledî yasdık ve on minder ve dört tencere ve on iki sahan ve on altı lenger ve bir ferâce ve bir şalvar ve bir sincab kürkünü bi-gayr-ı hakkın ahz ve ketm ve ihfâ etmeleriyle ben dahi mukaddemâ nakid ve eşyâ-i mezkûreden hissemi mesfûrûn Serabyon ve Losik ve Asvador’dan kassâm-ı beledî Ahmed Efendi huzûrunda ba‘de’d-da‘vâ ve’l-inkâr müdde‘â-yı mezkûrumdan mesfûrûn ile an-inkâr elli guruş bedel-i makbûza sulh olup anam hâlike-i mesfûrenin cemî‘ terekesine müte‘allika âmme-i da‘vâdan mesfûrûn Serabyon ve Losik ve Asvador’un zimmetlerini ibrâ ve ıskāt etmişidim lâkin merkūm Asvador müsâviye-i sulhda bizimle elli guruşa sulh olup zimmetimizi ibrâ ile elli altmış günden sonra sana malımdan iki yüz elli guruş veririm deyü eylediği va‘dine binâen meblağ-ı mezbûr-ı mev‘ûd iki yüz elli guruşu taleb ederim deyü olan da‘vâsı şer‘an sahîha olmamağla husemâsı merkūmûna suâl teveccüh etmeyip ve ber-vech-i muharrer suâl teveccüh etmemekle bundan akdem müdde‘î-i mesfûr mahkeme-i şer‘iyâtda lede’t-terâfu‘ bî-vech-i şer‘î mu‘ârazadan men‘ olunduğunu nâtık olan i‘lâm-ı şer‘înin mazmûnu[nu] dahi ikrâr etmeğin mûcebiyle müdde‘î-i mesfûr bî-vech-i şer‘î mu‘ârazadan men‘ olunduğu Mahkeme-i Bâb’dan huzûr-ı âlîlerine i‘lâm olundu. Fî 5 Cumâdelûlâ sene 1162