Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 166 Hüküm no: 119 Orijinal metin no: [17b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Hasan’ın katili firarî Çukadar Ahmed’in Bektaş Ağa b. Osman vasıtasıyla mahkemeye getirilmesini talep eden Fâtıma’nın kocası Müezzin Molla Mahmud b. Mehmed’in talebinin reddedildiği Ma‘rûz İstanbul’da Koruk Mahmud mahallesinde sâkine iken bundan akdem cerîhaten fevt olan Fâtıma bt. Hasan b. Abdullah’ın verâseti anası Havva bt. Abdullah ile sadrî sagīr oğlu Mehmed’e ba‘de’l-inhisâr sagīr-i mezbûr Mehmed’in babası ve velîsi Müezzin Molla Mahmud b. Mehmed meclis-i şer‘-i hatîrde Bektaş Ağa b. Osman muvâcehesinde katîle-i mezkûrenin kātili olup tahsîli için diyeti kürekde mahbûs iken firâr eden Çukadâr Ahmed işbu mezbûr Bektaş Ağa’nın menzilinde üç gün sâkin olmağla velâyetim hasebiyle kātil-i mezbûr Çukadâr Ahmed’i mezbûr Bektaş Ağa’dan ihzârını taleb ederim deyü olan da‘vâsı sahîha olmamağla şer‘an mezbûr Bektaş Ağa’ya suâl teveccüh etmeyip eb-i mezbûr müdde‘î-i mezbûr Molla Mahmud bi’l-velâye bî-vech mu‘ârazadan men‘ olunduğu Bâb’dan huzûr-ı âlîlerine i‘lâm olundu. Fî 7 min-Cumâdelûlâ sene 1162