Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 194 Hüküm no: 161 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Hasan’ın, Dimo v. Esteryo ve ortağı Kosta v. Dimo’nun işlettikleri dükkândaki hissesine ait kira bedelinin ödenmesi talebiyle açtığı davada haksız bulunduğu Ma‘rûz Zâtı zevci Ali Efendi b. Ömer ve Ali b. Abdullah ta‘rîfleriyle mu‘arrefe sahibe-i arzuhâl Âişe Hatun bt. Hasan meclis-i şer‘-i hatîrde bakkāl tâifesinden arzuhâlde mezkûr Karaoğlan demekle ma‘rûf Dimo v. Esteryo ve şerîki Kosta v. Dimo zimmîler muvâcehelerinde mesfûrân Dimola [Dimo] ve Kosta zimmîler arzuhâlde mezkûr Kızılmaslak kurbünde vâki‘ ma‘lûmü’l-hudûd bakkāl dükkânının öteden beri müste’cirleri olup ve dükkân-ı mezkûrun altı sehim i‘tibârıyla iki sehmi benim ve dört sehmi âharların dört sehmini sahiblerinden beher şehr beşer buçuk guruş ücret ile akd-i icâre etmişler iken bana biz âharların dört sehimlerini yüz yedişer paraya istîcâr eyledik deyü beni tagrîr ve târih-i mezkûrda benim dükkân-ı mezkûrda olan iki sehmimi dahi şehrî elli üçer para ve birer akçeye benimle akd-i icâre etmekle târih-i mezbûrdan beri şerîklerimin akdi üzere benim dükkân-ı mezkûrda olan iki sehmimin icâresinden bâkī kalan noksanı taleb ederim deyü olan da‘vâsı takrîr-i meşrûhu üzere sahîha olmamağla hasımları merkūmâna şer‘an suâl teveccüh etmeyip müdde‘iye-i mezbûre bî-vech mu‘ârazadan men‘ olundu Mahkeme-i Bâb’dan huzûr-ı âlîlerine i‘lâm olundu. Fî 24 Cumâdelûlâ sene 1162