Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 193 Hüküm no: 160 Orijinal metin no: [23a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bogos v. Avokin’in memleketi Koçhisar’a götürmek istediği Aksepet bt. Kasber’in kendisiyle gelmediği iddiasıyla açtığı davanın reddedildiği Ma‘rûz Fi’l-asl Anadolu’da Koçhisar kasabası ahâlîsinden olup mahmiye-i İstanbul’da Balcı mahallesinde tavattun eden Bogos v. Ovakin zimmî meclis-i şer‘-i enverde mahalle-i mezkûre mütemekkinelerinden olup mahalle-i mezkûrede kendiye akd-i nikâh ve tezevvüc eylediği zevce-i medhûlün-bihâsı Aksepet bt. Kasber v. Sahak zimmiyenin babası ve tarafından husûs-ı âti’z-zikre vekîl-i sâbitü’l-vekâlesi olan mesfûr Kasber muvâcehesinde hâlâ ben zevcem müvekkile-i mesfûre Aksepet zimmiyeyi âyinimiz üzere mehr-i mu‘accelini vermiş olmamla fi’l-asl vatan-ı asliyem olan İstanbul’a müddet-i seferden ba‘îd Anadolu’da Koçhisar kasabasına gö[tü]rmek murâd eylediğimde benim ile kasaba-i mezkûreye gitmekden imtinâ‘ eder vekîli ve babası mesfûra suâl olunup kızı ve müvekkilesi merkūmenin bana itâ‘at ve benimle ma‘an vatan-ı asliyem olan Koçhisar kasabasına gitmeğe tenbîh taleb ederim deyü olan da‘vâsı takrîr-i meşrûhu üzere sahîha olmamağla vekîl-i mesfûra şer‘an suâl dahi teveccüh etmeyip müdde‘î-i mesfûr bî-vech mu‘ârazadan men‘ olunduğu Mahkeme-i Bâb’dan huzûr-ı âlîlerine i‘lâm olundu fermân men-lehu’l-emrindir. Fî 23 Cemâziyelevvel sene 1162