Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 197 Hüküm no: 167 Orijinal metin no: [24a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman b. Süleyman’a ait olup İznikmid’e gönderilmek üzere Ali Reis b. Ebubekir’in sefinesine yüklenen susamın İstanbul şirugancı esnafına satılması Ma‘rûz İstanbul’da şîrugancı esnâfının kethudâsı Ahmed Ağa b. Ali ve ustalarından es-Seyyid el-Hâc Ali b. es-Seyyid Süleyman ve Abdullah Beşe b. Abdülmuttalib ve Mustafa Çelebi b. el-Hâc Hüseyin ve Abdullah Çelebi b. Bekdaş ve el-Hâc İbrahim b. Salih ve Molla Mustafa b. Hacı Hasan nâm kimesneler meclis-i şer‘-i enverde sisam tüccârından el-Hâc Osman b. Süleyman muvâcehesinde İznikmid İskelesi sefîneleri mellâhlarından Ali Reis b. Ebûbekir hazır olduğu hâlde öteden beri Âsitâne-i sa‘âdet’e gelen zehâir Âsitâne’den taşra memleketlere ihrâc ve füruhtu Âsitâne-i sa‘âdet ahâlîsine müzâyaka verir hâlâtdan olmağla memnû‘âtdan iken mezbûr el-Hâc Osman Âsitâne’de der-mahzen olan sisamından yüz keyl sisam ihrâc ve İznikmid kasabasında bey‘ olmağı’çün hâzır-ı mezbûr Ali Reis’in sefînesine hâlâ tahmîl etmekle zikrolunan sisamı sefîne-i mezkûreden ihrâc ve semen-i misliyle esnâfımız ustalarına bey‘iyle mezbûr Osman’a tenbîh taleb ederiz deyü olan da‘vâlarında mezbûr el-Hâc Osman cevâbında fi’l-vâki‘ Âsitâne’den taşra zehâir ihrâcı memnû‘âtdan olduğunu ikrâr ve zikrolunan yüz keyl sisamı sefîne-i mezkûreden ihrâc ve semen-i misliyle esnâf-ı mezkûr ustalarına bey‘ ve fîmâ-ba‘d dahi Âsitâne’den taşra sisam satmamağa ta‘ahhüd edip ol vechile kat‘-ı nizâ‘ ettikleri Mahkeme-i Bâb’dan huzûr-ı âlîlerine i‘lâm olundu. Fî 28 Ca sene 1162