Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 197 Hüküm no: 166 Orijinal metin no: [24a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yenibahçe keçeciler esnafından Yusuf b. Abdullah’ın uygunsuz hal ve hareketlerinden dolayı esnaflıktan çıkarılıp cezalandırılması Ma‘rûz Mahmiye-i İstanbul’da Yenibahçe’de Keçeciler esnâfının yiğitbaşıları Ali b. Mustafa ve ustalarından Ahmed Çelebi b. Abdullah ve el-Hâc İbrahim b. Salih ve Ali Çelebi b. Mustafa ve Hasan Beşe b. Hüseyin ve Mehmed Beşe b. Mustafa ve Hasan Beşe b. Ahmed ve Mustafa b. İsmail ve es-Seyyid Ahmed Çelebi b. Mustafa ve Mehmed b. Hasan nâm kimesneler meclis-i şer‘-i enverde esnâf-ı mezkûreden olup Mumcu Mehmed Beşe mübâşeretiyle ihzâr-ı şer‘ olunan Yusuf b. Abdullah muvâcehesinde mezbûr Yusuf öteden beri kendi hâlinde olmayıp san‘at-ı mezkûremizin kadîmî olan nizâmlarına muhâlif işlerde bulunup ashâb-ı san‘atımıza ihtilâl vermekle nush u pendi sadedinde olan ihtiyâr ustalara şütûm-ı galîza ile şetm ve ırzlarını hetk eder olup bir vechile mezbûr Yusuf’dan emniyet ve râhatımız yokdur deyü teşekkî ve mezbûr Yusuf’un salâhı zâhir olunca san‘at-ı mezkûreyi işlemekden men‘ile ta‘zîr olunması bâbında fermân-ı âlî ricâsında oldukları Mahkeme-i Bâb’dan huzûr-ı âlîlerine i‘lâm olundu. Fî 28 Ca sene 1162